Баянхонгор аймгийн Гурванбулаг сумын нутагт ашигт малтмал олборлодог “Жи энд Ю Гоулд”  ХХК-ний үйл ажиллагааг эсэргүүцэн нутгийн иргэд жагсаж эхэлсэн байна. Уг нь Баянхонгор аймгийн мэргэжлийн хяналтын газраас тус компанийн үйл ажиллагааг түр хугацаагаар хаах шийдвэр гарган, лацаджээ. Гэвч МХЕГ-ын байцаагч н.Батбаяр дээрх шийдвэрийг хүчингүй болгосноор тус компани үйл ажиллагаагаа үргэлжлүүлэн явуулах болсон байна. Тиймээс нутгийн иргэд "Жи энд Ю Гоулд" компанийн үйл ажиллагааг эсэргүүцэн өчигдөр 12.00 цагаас эхлэн жагсаж эхэлжээ. Жагсаалд Гурванбулаг сумын Засаг дарга, татварын байцаагч нар ч оролцож байгаа юм байна.

Нутгийн ард иргэд энэ талаар ярихдаа “Жи энд Ю гоулд” ХХК-ийн үйл ажиллагаа явуулах зөвшөөрөл хуулийн дагуу цуцлагдсан. Нийслэлийн СБД-ийн шүүгч болон нийслэлийн захиргааны хэргийн шүүгчийн захирамж хүртэл гарсан. Гэвч тус компани нь Монгол улсын хууль тогтоомжийг үл ойшоож үйл ажиллагаагаа явуулж байна. Энэхүү асуудалд холбогдох газрууд анхаарал хандуулж, зогсоох хэрэгтэй байна” гэж байгаа юм.

Гурванбулаг сум нь ундны усны хомсдолтой бөгөөд ашигт малтмал олборлох үйл ажиллагаа цаашид үргэлжилбэл усгүй болох аюул нүүрлэнэ гэж иргэд хэлж байна.