Замын цагдаагийн газар нь хошин урлагийн "Х ТҮЦ" продакшн, Майнд Вайд агентлагтай хамтран “Хайртай хүнийхээ төлөө хамгаалах бүсээ бүслэ" арга хэмжээг зохион байгуулан явуулах гэж байна. Тэгвэл энэ талаар МУСТА, жүжигчин Н.Ононгоос зарим зүйлийг тодрууллаа.

-“Хайртай хүнийхээ төлөө хамгаалах бүсээ бүслэ" арга хэмжээний талаар?

-Бид өнөөдөр иргэн хүнийхээ хувьд сэтгэлд зовниж байгаа зүйлийнхээ төлөө дуу хоолойгоо илэрхийлэхээр Замын цагдаагийн газартай хамтарлаа. Учир нь манай улсад замын хөдөлгөөнд болгоомжгүй оролцсоноос, хамгаалалтын бүсээ зүүгээгүйгээс үүдэлтэй олон осол аваар гардаг.  Тиймээс бид замын хөдөлгөөнд соёлтой оролцох, хүн бүр хамгаалалтын бүсээ зүүж заншихад нөлөөлөх зорилгоор зарим нэг арга хэмжээг зохион байгуулах гэж байна.  Хүний амь бол хамгийн нэгдүгээрт байдаг гэдгийн хүмүүс ойлгох хэрэгтэй. Залуучууд маань  гоё, сайхан машин уналгүй яахав. Гэхдээ замын хөдөлгөөнд болгоомжтой оролцож, эрдэнэт хүний амь насанд халгаатай үйлдэл хийхээс сэрэмжилж байх хэрэгтэй. Тиймээс наанадаж хамгаалалтын бүсээ зүүж замын хөдөлгөөнд оролцох чухал юм. Таксины жолоочууд маань ч үйлчлүүлэгчээ бүсээ зүүхийг сануулах хэрэгтэй юм. Хүн бүр замын хөдөлгөөнд бүсээ зүүж оролцвол гарах үр дагавар ямар байхыг надаар хэлүүлэлтгүй хүмүүс маань мэдэж байгаа байх аа.

-Тэгэхээр та нарын хувьд тоглолтынхоо агуулгад энэ асуудлыг тусгаж өгөх гээд байгаа юм уу. Эсвэл өөр арга хэмжээ зохион байгуулах уу?

-Угаасаа бид нар тоглолтынхоо өмнө болоод төгсгөлд үзэгч түмнээ уриална. Мөн тоглолтын рекламанд тусгаж өгсөн байгаа. Билет маань ч анхааруулсан уриалсан үгтэй хэвлэгдсэн. Яг тоглолтынхоо агуулгад оруулж өгнө гэхээр бас утгагүй. Уран бүтээл биш сурталчилгаа маягийн зүйл болчих гээд байгаа. Ер нь үүнээс хойш ч “Х Түц”-тэй хамааралтай бүх зүйлийн ард зөв энергитэй, зөв мессежүүд байнга явж байх болно.

-Ганц хамгаалалтын бүснээс гадна утаа, агаарын бохирдол гээд л нийгэмд болохгүй байгаа зүйлийн эсрэг тухайн байгууллагатай нь хамтран тодорхой ажлуудыг хийх үү?

-Уг нь ноднин жилээс эхэлсэн юм. “Цэвэр цэмцгэр нийслэлийн төлөө хамтдаа зүтгье” гэж бид уриалж байсан юм.  Тэгсэн манайхыг “фрута” ивээн тэтгэдэг байсан учир нийслэл гэдэг реклам орлоо гэх яриа гараад үүнийгээ больсон. Ингээд бид зөвхөн нийслэлийн тухай яриа орохоор хүмүүс буруу ойлгохын байна гэж үзээд салбар салбарлуу орж дуу хоолойгоо хүргэхээр болсон. Магадгүй төд удахгүй цэвэр орчны төлөө арга хэмжээнүүдийг зохион байгуулж ч болох юм.

-“Хамгаалах бүсээ бүслэ” арга хэмжээнд Замын цагдаагийн газраас хамтарч байгаа шүү дээ. Тэгвэл тэдний зүгээс юу хийж байгаа вэ?

-Бид энэ удаагийнхаа тоглолтоор замын хөдөлгөөнд соёлтой оролцъё гэдэг мессежийг өгье гэхээр яалтачгүй замын хөдөлгөөнийхөнтэй хамтрахаас өөр аргагүй байгаа. Урлагийнхан уран бүтээлчид өөрсдөө замын цагдаагийнхантай хамтраад хүмүүст мессеж өгөөд байхад иргэд үүнийг ухамсарлаасай. Замын цагдаа нар биш хэрнээ бид иргэн хүнийхээ үүднээс эмзэглээд энэ ажлыг зохион байгуулж байна.

-Хүүхдүүдийн дунд зургийн уралдаан зарлаж байгаа гэсэн үү?

-Ногоон гэрэл, шар гэрэл улаан шугам будуулж хүүхдүүдийнхээ дунд зургийн уралдаан зохион байгуулна. Яг ямар үед замаар гардаг юм гэдгийг будгаар илэрхийлэх юм. Мөн замын хөдөлгөөний талаарх сэтгэгдлээ хүүхдүүд өөрсдөө зурж танилцуулна. Замын цагдаагийн газар, “Майнд Вайд” агентлагтай бид хамтарч ажиллаж байгаа.

-Шагналын сангаа хэрхэн зохицуулж байна?

-Ямар ч байсан эхний ээлжиндээ манай тоглолтыг дандаа үзэх эрхээр ч юм уу шагнана. Эсвэл бидний ажлыг дэмжиж ивээн тэтгэх компаниудын нэрийн шагналыг гардуулна. Бид анх удаа л ийм ажил хийж байгаа болохоор туршлага бага байна. Цаашдаа илүү чанаржиж, хүрээгээ тэлнэ гэж найдаж байгаа.

-Рекламаараа бас цацаад эхлэхээр хүүхдүүд ч нэгийг бодох байх л даа?

-Ер нь хошин урлагийн тоглолтын рекламыг хүүхдүүд их үздэг юм билээ. Биднийг тоглолтоо хийж явахад ч хүүхдүүд рекламыг маань цээжилчихсэн уншиж өгч байсан. Энэ бүхнээс хараад бид тоглолтынхоо рекламаар замын хөдөлгөөнд соёлтой оролцож, бүсээ бүслэхийг оруулж өгч байгаа.

-Таны хувьд хүүхдүүдээ хамгаалалтын бүсийг нь бүслүүлж сургасан уу?

-Манайх гурван хүүхэдтэй. Гурвуулаа бүсээ бүслээд заншчихсан. Бүсээ бүслэхгүй бол хүүхдээ машинд суулгахгүй. Тиймээс ч хүүхдүүд маань хэлүүлэлтгүй бүсээ бүслээд хэвшчихсэн. Манай хамтлагт бол ганц нэг залуус бүс бүслэхээр эвгүй байна гээд бүсэлдэггүй. Тэгэхээр бид өөрсдөө ийм зүйлийг зохион байгуулж байгаа юм чин хамтлагийн маань зарим залуусч бүсээ бүсэлдэг болно. Энэ чинь л дэвшил. Ямарваа зүйл бага багаар л үр өгөөжөө өгдөг. Сонирхуулахад, би энэ жил машингүй явна гэж бодож байгаа. Би энэ стресснээс гарахын тулд зориуд алхахаар шийдсэн. Машинаа хаана тавих уу гэж ч бодохгүй амар шүү дээ.

-Та нарын санаачилсан энэхүү арга хэмжээг зарим хүмүүс ашгийн төлөө гэж бодож байгаа байх л даа?

-Энэ ямар ч ашиг, эдийн засгийн бус зүйл. Уран бүтээлч хүн ямарваа нэгэн зүйлд эмзэглэдэг байх хэрэгтэй. Бачуурдаг байх ёстой. Тэгэхээр бачуурлаа иймэрхүү зүйлээр л гаргаж нийгэмдээ ойлгуулая гэж бодсон юм шүү. Энэ бол ерөөсөө л  “Х Түц” продакшны эмзэглэл. Монгол Улсын иргэн хүн учир иргэнийхээ үүргийг л нэгдүгээрт тавьж байгаа хэрэг. Жолооч нар нь явган зорчигчдоо зам тавьж өгдөг байх, явган зорчигчид нь явах ёстой гэрлээрээ тэвчээртэй замын хөдөлгөөнд оролцдог болоосой гэдэг үүднээс л бид Замын цагдаагийн газартай хамтарч зарим үйл ажиллагааг зохион байгуулах гэж байна.

-“Нэг өдрийн хаан” тоглолт өмнөх тоглолтуудаас юугаараа ялгарах вэ?
-Илүү энтертаймент талдаа. Хуучин бол бид тав таван үзэгчидтэй тоглодог байсан бол одоо тоглолтын арга барилаа өөрчилж үзье гэж бодож байна.

-Тоглолт хэзээнээс эхлэх вэ?

-Энэ бямба гарагт 19.00 цагаас эхэлнэ. Өдөр бүр тоглоно.

-“Нэг өдрийн хаан” гэх тоглолтын нэрнийхээ талаар?
-Бид бүхэн эх орондоо ганцхан өдөр хаан биш ард иргэд нь хэдэн мянган жилээр эзэн нь болж сайхан амьдрая гэдэг утгаар энэ нэрийг өгсөн.