Сэлэнгэ аймгийн Цагдаагийн газрын Эрүүгийн тасгийн дарга, дэд хурандаа П.Өлзийсайханыг өнгөрсөн тавдугаар сараас эхлэн цагдан хорьсон. Тэгвэл түүний өмгөөлөгч Л.Баттогтохоос зарим зүйлийг тодрууллаа.

-П.Өлзийсайханыг хүний биед гэмтэл учруулсан хэргээр шалгаж байгаа биз дээ?
-Өнөөдөр албан тушаал эрх мэдлээ ашиглаж, 1937 оных шиг хэлмэгдүүлэлтийг явуулж байна. Нэг ёсондоо Эрүүгийн тасгийн дарга П.Өлзийсайхан хүнд гүтгүүлж, хэлмэгдүүлэлтээр өдгөө цагдан хоригдсон.

Эрүүгийн тасгийн дарга, дэд хурандаа П.Өлзийсайхан нь Сэлэнгэ аймагт Эрүүгийн тасгийн даргаар ажиллаж байх хугацаандаа хууль бус мод огтлох, алт олборлох, ан гөрөө хийх, авлигалтай тэмцэх ажиллагаанд идэвхтэй оролцдог сайн ажилчин байсан. Улмаар тухайн үед олон ч хэргийг илрүүлж, хууль бус үйл ажиллагаа явуулсан хүмүүст нь зохих шийтгэлийг нь оноодог байсан. Ингээд Сэлэнгэ аймгийн Прокурорын дарга Болд-Эрдэнэ гэж этгээдийг хээл хахууль авсан хэргээр шалгасан байдаг. Улмаар эл хэрэг АТГ-т шилжиж дараа нь шүүхэд шилжүүлж Болд-Эрдэнэ буруутай нь тогтоогдож хорих ял авсан. Тэрбээр ялаасаа нэг жилийг л биеэр эдэлсэн. Харин гарч ирээд эрх мэдлээ ашиглаж, хуульд хөндлөнгөөс автаж П.Өлзийсайханыг гүтгэж, түүнээс өшөөгөө авахыг оролдож байна.

-Тэгэхээр энэ хэрэг Прокурорын орлогч дарга гэх Болд-Эрдэнэтэй хамаатай гэж үү?
-Болд-Эрдэнэ гэж прокурорын дарга хорих ялаа эдэлж гарч ирээд П.Өлзийсайхан болон өөрийг нь байцааж байсан Бат-Олзвой, Гантулга нарыг Прокурорын дэргэдэх мөрдөн байцаах газар шалгуулсан. Ямар үндэслэлээр шалгуулсан гэхээр хууль бусаар намайг баривчилсан. Хууль бусаар нотлох баримт бүрдүүлсэн гэх үндэслэлээр гомдол гаргасан байдаг. Энэ хэргийг Прокурорын дэргэдэх мөрдөн байцаах алба шалгаад дараа нь нийслэлийн прокурор хянаад эрүүгийн хэрэг үүсгэсэн. Улмаар шүүхэд шилжээд энэ хэргийг гэмт хэргийн бүрэлдэхүүнгүй гэж үзсэн. Ингээд өнгөрсөн долоо хоногт Улсын дээд шүүхээр хэргийг цагаатгасан.  Гэвч тэрбээр П.Өлзийсайхан нарыг буруугүй нь нотлогдохоор өөр хувилбараар оролдож эхэлсэн.

-Тэгэхээр П.Өлзийсайханыг  Болд-Эрдэнэ гэж хүний өгсөн өргөдөл, гомдлоор цагдан хориод байгаа гэж ойлгож болох уу?
-Хэн өгсөн нь тодорхойгүй нэргүй хүнээс ирсэн мэдээллээр П.Өлзийсайханд Нийслэлийн прокуророос эрүүгийн хэрэг үүсгээд шалгаж байна. Тавдугаар сарын 11-нд эрүүгийн хэргийг үүсгэсэн. Ингэхдээ иргэнд санаатайгаар хүнд гэмтэл учруулсан гэх үндэслэлийг хэлсэн байдаг. Улмаар хорих 461 дүгээр ангид тавдугаар сарын 17-нд цагдан хорьсон. Ингээд тавдугаар сарын 11-нд эрүүгийн хэрэг үүсгэснээс 11 хоногийн дараа шүүх эмнэлгийн дүгнэлт гарсан. Шүүх эмнэлгийн дүгнэлтээр өнөөх гэмтсэн гээд байгаа хүн нь хүнд гэмтэлтэй гэж гарсан. Хамгийн сонирхолтой нь хохирогч гээд байгаа хүн маань нэхэмжлэл, гомдол гаргаагүй байгаа юм. Үүнийгээ ч хавтаст хэрэгт хавсаргаж өгсөн.

-Хэргийг дэлгэрэнгүй тайлбарлаач?
-Одоогоос долоон жилийн өмнө наадмаар Эрүүгийн тасгийн дарга П.Өлзийсайхан хамгаалалтанд гарч байсан замын цагдаагийн байцаагчид үүрэг өгсөн байгаа. П.Өлзийсайханы хувьд замын цагдааг хууль бус үйл ажиллагаа явуулаад байна. Яагаад ямар ч зөрчилгүй машиныг журамлаад байна вэ гэсэн шаардлагыг тавьсан. Тэгэхээр өнөөх нь өөдөөс нь маргалдсан байдаг. Улмаар П.Өлзийсайхан өнөөх цагдааг нэг удаа алгадсан. Улмаар энэ алгадсан гээд байгаа нь өдгөө долоон жилийн дараа эрүүгийн хэрэг үүсгэгдээд явж байна. Хохирогч гээд байгаа залууг Мөнгөнхундага гэдэг. Тэрбээр П.Өлзийсайханы алгадалтаас энэ гэмтэл үүсээгүй гэдгийг хэлсэн. "Надад ямар нэг нэхэмжлэх зүйл байхгүй. Би өргөдөл гомдол гаргаагүй байтал ийм байдал яагаад үүсч байгааг гайхаж байна гэж өөрөө мэдүүлсэн" юм. Тэгэхээр энэ хэрэг эртнээс нарийн зохион байгуулагдсан хэрэг. Өмнөх үйлдэл нь ч гэсэн эрүүгийн хэрэг үүсгээд шалгасан ч шүүх цагаатгасан.

-Ямар зүйл заалтаар эрүүгийн хэрэг үүсгээд байгаа вэ?
-Эрүүгийн хуулийн 230.3-т зааснаар хүний биед хүнд гэмтэл санаатай учруулсан гэж үзээд хэргийг шүүхэд шилжүүлээд байна.

-П.Өлзийсайханыг гүтгээд байгаа гэх Болд-Эрдэнийн талаарх мэдээллийг өгч болох уу?
-Болд-Эрдэнэ гэх Сэлэнгэ аймгийн прокурорын орлогч дарга маань авлигын хэрэгт холбогдож, авлига авсан гэдэг нь тогтоогдсон. Ингээд нэг жил орчим ял эдлээд үлдсэн хугацааг нь тэнсэн авч гарч ирсэн.

-Тэгэхээр чухам ингэж хэлмэгдүүлээд байгаа нь яг ямар зорилготой юм бол?
-П.Өлзийсайхан гэдэг хүнийг л албан тушаалд байлгахгүй гэсэн зорилго цаана нь агуулагдаж байна. Прокурорын газар болон Прокурорын дэргэдэх мөрдөн байцаах албанаас П.Өлзийсайханы ажлыг түдгэлзүүлье гэдэг саналыг ЦЕГ-т тавьсан байдаг. ЦЕГ-аас хариу мэдэгдэхдээ “П.Өлзийсайхан гэдэг хүн ажилдаа маш шударга, гадны нөлөөнд автахгүй хүн. Тиймээс бид ийм ажилчныхаа ажлыг түдгэлзүүлэх шаардлага байхгүй. Тиймээс цаашид ажлыг нь үргэлжүүлж ажлуулна” гэсэн тоот өгсөн байгаа.

-Батлан даалтад гаргах асуудлыг яагаад хүлээж авахгүй байгаа юм бол?
-Уг нь эрүүгийн байцаан шийтгэх хуулинд батлан даалтад гаргахдаа хувийн батлан даалтад, бусдын батлан даалт, гадагш явахгүй батлан даалт, эд хөрөнгийн барьцаатай батлан даалтанд гаргах гэсэн хувилбарууд байдаг.  Энэ бүх хувилбаруудаараа бид удаа дараа санал тавьсан ч хүлээж аваагүй. Найз нөхдийнх нь зүгээс ч гэсэн 10 сая төгрөгийн барьцаа өгч батлан даалтад гаргахыг хүссэн ч өнөөдрийг хүртэл цагдан хориотой байж байна. Миний хувьд зургаан удаа батлан даалтад гаргах хүсэлтийг өгсөн.

-Долоон жилийн өмнөх гэмтлийг шүүх эмнэлгээс одоо хүнд гэмтэл гэж тогтоох боломжтой юм уу?
-Нэг жишээ дурдахад, өчигдөр хэн нэгэнд зодуулсан этгээдийг хоёр хоногийн дараа шинжлэхэд энэ хоёр хоногийн дотор өөр хүнд зодуулсан байж болзошгүй гээд шүүх эмнэлэг дүгнэлт гаргадаггүй юм. Энэ бол ерөөсөө нийтлэг жишиг. Тэгэхэд долоон жилийн өмнө алгадсан хэргийг өнөөдөр хүнд гэмтэл болгож гаргаж байна. Үүнийг бол урьдаас төлөвлөж зохион байгуулсан хэрэг.

-П.Өлзийсайханы биеийн байдал хэр байна?
-Маш муу байгаа. Зүрх нь өвдсөн. Даралт нь ихэссэн байдалтай байна.