Ажилласан жил, тэтгэврийн даатгалын шимтгэлийг нөхөн тооцох тухай хуулийн хэрэгжилт өнөөдөр дуусна. Тус хуулийн хэрэгжилт наймдугаар сарын 1-нд дуусах байсан ч Хүн амын хөгжил, нийгмийн хамгааллын сайд Эрдэнэ хугацааг нь сунгасан юм. Учир нь, долдугаар сарын 30 гэхэд 260 мянган хүн л ажилласан жилээ нөхөн тооцуулахаар бүртгүүлсэн байжээ. Иймээс хугацааг хоёр сараар сунгасан юм. Албаны хүмүүсийн хэлж байгаагаар хуулийн хэрэгжих хугацааг дахин сунгахгүй ажээ. Мөн энэ оны наймдугаар сарын 1-нээс аравдугаар сарын 1-нийг хүртэл хүсэлтээ гаргасан иргэдийн ажилласан жил, тэтгэврийн даатгалын шимтгэлийг нөхөн тооцсон хугацааг 2015 оны нэгдүгээр сарын 1-нээс тооцож, Нийгмийн даатгалын сангаас шинээр тэтгэврийн эрх үүсч байгаа болон тэтгэвэр авч байгаа иргэдийн тэтгэврийн нэмэгдлийг тооцуулахаар болжээ.