ГССҮТ-ийн эмч ажилчид шинэ удирдлагаа хүлээн зөвшөөрөхгүй хэмээн эсэргүүцлээ илэрхийлээд хэд хонож байгаа. Тэгвэл өнөөдөр эмч ажилчдын төлөөл тус төвийн өнөөгийн байдлын талаар сэтгүүлчдэд мэдээлэл хийлээ.

Юуны өмнө тэд ГССҮТ-ийн даргаар томилогдсон Ц.Энхбат гэгчийг эсэргүүцсэн шалтгаанаа “Ц.Энхбатыг томилохдоо сонгон шалгаруулалт хийлгүй шууд томилсон. Дээр энэ хүнийг хувийн зан чанарын хувьд бид яасан ч хүлээн авч чадахгүй” хэмээн тайлбарлаж байлаа. Мөн тэрээр томилогдсныхоо дараа тус төвийн эмч нарыг авилгалчид мэтээр хэвлэлд ярилцлага өгсөн байна.  Үүнд нь дургүйцсэн эмч ажилчид ЭМЯ-ны ажлын хэсэгтэй хийсэн хуралдааны үеэр уучлал гуйхыг шаардахад тэрээр тийм зүйл яриагүй хэмээн татгалзсан аж.

Тэд энэ эсэргүүцлээ үргэжлүүлэхээ мэдэгдсэн бөгөөд одоогийн байдлаар ГССҮТ-ын эмч нарын 90-ээд хувь нь буюу 86 эмч ажилаас халагдах өргөдөлөө өгсөн гэлээ. Үүнээс гадна тус төвийн 216 сувилагч тусгай мэргэжилтнүүд / сувилагч, асрагч /-ийн 50 хувь нь буюу 112  хүн өнөөдөр ажилаас халагдах өргөдөлөө өгөх юм байна.

Түүнчлэн “Эрүүл мэндийн иргэний хяналт шинжилгээний зөвлөл”-өөс өнгөрсөн сарын 26, 27-ны өдрүүдэд ажил хаясан эмч нарт  хариуцлага тооцох шаардлагыг ЭМ-ийн сайд Н.Удвалд өгөөд байгаа. Тэд энэ шаардлага дээр бичигдсэн зүйлсийг няцааж тус эмнэлэгт тогтсон хэвшлийн дагуу долоо хоног бүрийн баасан гарагт хийдэг мэс заслын өрөөнүүдийн цэвэрлэгээг нэг өдрөөр урагшлуулан өнгөрсөн сарын 26-ны өдөр хийсэн бөгөөд 27-ны өдөр нь төлөвлөгөөт мэс заслуудаа хийсэн гэдгийг хэллээ. Мөн 26-ны өдөр 243, 27-ны өдөр 255 өвчтөн хүлээн авч эмчилгээ үйлчилгээ үзүүлсэн архивын баримт ч байгааг дурьдсан юм.