Улсын хэмжээнд жил бүр явагддаг ургац хураалт, хадлан бэлтгэлийн ажил одоогийн байдлаар 44 хувьтай байна.Үйлдвэр, хөдөө аж ахуйн сайдын тушаалын дагуу яамнаас томилогдсон ажлын хэсгийнхэн өнгөрсөн сард 21 аймгийн 81 суманд ажиллажээ. Үүний үр дүнд хадлан бэлтгэл, ургац хураалтын ажлын хэвийн хэмжээнд хүрсэн бөгөөд Говь-Алтай аймаг тэргүүлэх үзүүлэлтэйгээр урьдчилсан дүн гарчээ. Түүнчлэн аймаг сумдын хүрээнд хэрэгжүүлж буй хадлан тэжээлийн аюулгүйн нөөц бүрдүүлэх ажилд 15 аймаг дотоод нөөц бололцоогоо ашиглан идэвхтэй ажиллажээ. Харин Завхан, Сэлэнгэ, Хэнтий, Өвөрхангай аймаг аюулгүйн нөөцдөө өвс хадлан бэлтгэх ажилд тодорхой хөрөнгө мөнгө шийдэж чадаагүй учир хангалтгүй гэсэн үзүүлэлтэй гарчээ. Архангай аймгийн Хангай сумын хэмжээнд хадлан бэлтгэл дөнгөж 2,1 хувьтай байгаа нь хамгийн бага үзүүлэлт гэнэ. Мөн Дорноговь, Дорнод аймгуудад энэ жишээ давтагдаж хэдийгээр өвс хадлангийн гарц сайн байгаа ч хадлан бэлтгэлийн хувь хангалтгүй байгаа гэнэ.
