Хүүхэд багачууд маань сургуулиа тарж яваад эсвэл сургуульдаа ирж байгаад авто замын осолд их өртдөг. Тийм ч учраас Замын цагдаагийн газраас  хошин урлагийн "Х ТҮЦ" продакшн, "Майнд вайд" агентлагтай хамтран  хүүхдүүдийн дунд "Замын хөдөлгөөнд соёлтой оролцоё" сэдэвт гар зургийн уралдаан зарлах гэж  байгаа билээ. Тэгвэл ирэх даваа гарагаас сургууль цэцэрлэгүүдэд уралдааны удирдамжийг тараах юм  байна. Энэхүү уралдаанд оролцохыг хүссэн хүүхэд багачууд байвал нээлттэй гэдгийг зохион байгуулагчдын зүгээс хэлж байна.

Ямартаа ч зохион байгуулж байгаа арга хэмжээнийх нь талаар Замын цагдаагийн хэвлэл мэдээллийн ажилтан Л.Амаржаргалаас асууж тодрууллаа.

-Хүүхэд зам тээврийн осолд өртөхөөс сэрэмжлүүлэх зорилготой эл уралдааныхаа талаар?

- Хүүхдийг зам тээврийн осол хэргээс урьдчилан сэргийлэх зорилгоор төрийн бус байгууллагатай хамтран ажил хийж байгаа боловч эцэг эх, багш нарын оролцоо их дутмаг байна. Эцэг эхчүүд хүүхдээ хэрхэн аюулгүй замын хөдөлгөөнд оролцох талаар хэлж зөвлөхөөс гадна хараа хяналтгүй замын хөдөлгөөнд оролцуулах, хүүхдийг буруу тээвэрлэж явдаг нь осол хэрэгт хүүхэд өртөх шалтгаан нөхцлийг бий болгож байдаг. Тиймээс бидний дараагийн хэрэгжүүлж байгаа арга бол хүүхдүүдийнхээ үзэх дуртай хошин урлагийн хамтлагтай хамтрах явдал. "Х Түц" продакшн, "Майнд вайд" агентлагтай хамтран "Замын хөдөлгөөнд соёлтой оролцоё" сэдэвт гар зургийн уралдааныг зохион байгуулах гэж байна.

-Хүүхэд зам тээврийн осолд өртсөх нь сүүлийн саруудад ямар байна вэ?

-Эхний 9 сарын байдлаар  хүүхэд зам тээврийн осол хэрэг бүртгэгдсэн 823 байгаас 860 хүүхэд хүнд хөнгөн гэмтэж 5 хүүхэд нас барсан  байна энэ нь зөвхөн нийслэлийн хэмжээнд шүү. Зөвхөн 9 сард гэхэд 1 хүүхэд нас барж 108 хүүхэд хүнд хөнгөн гэмтсэн.

-Хүүхэд замын хөдөлгөөнд ганцаараа оролцож осолд өртөх нь их үү. Автомашин дотор явж байгаад осолд орох тохиолдол их гардаг уу?

-Хүүхэд явганаар замын хөдөлгөөнд оролцож гэмтэхээс гадна тээврийн хэрэгсэл дотор сууж яваад бэртэж гэмтэх амь насаа алдах явдал гарсаар байна. Энэ нь эцэг эхчүүд хүүхдийг тээврийн хэрэгслээр тээвэрлэхдээ буруу тээвэрлэдэг, бага насны хүүхдийг хараа хяналтгүй замын хөдөлгөөнд оролцуулдаг зэргээс шалтгаалж байгаа.

-ЕБС-иудыг бүгдийг нь автобустай болгочихвол осол аваар мэдэгдэхүйц буурах байх даа?

-Нийслэлийн засаг даргаас ерөнхий боловсролын сургуулиудыг автобустай болгох талаар үүрэг чиглэлийг Боловсролын газарт өгсөн. Нэгдсэн автобустай болчихвол хүүхэд осол хэрэгт өртөх явуудал буурахаас гадна гэмт халдлагад өртөхгүй. Тухайлбал / хулгай, дээрэм гэх мэт /. Мөн эцэг эхчүүд замын түгжрэлд орохгүй, хөдөлгөөний ачаалал хүртэл буурах сайн талтай юм.

-Осолд өртөж буй хүүхдүүдийг насны байдлаар нь авч үзвэл?

-Хүүхдийг насны байдлаар авч үзвэл 0-7 насны хүүхэд 41,9 хувь, 8-14 насны хүүхэд  41,7 хувь 15-17 насны хүүхэд 16,4 хувь эзлэж байна. Үүнээс эрэгтэй хүүхэд 63,2 хувь бол эмэгтэй хүүхэд 36,8 хувь, явганаар 63,2 хувь  явган зорчигчийн буруугаас 7.7 хувь бол жолооч, эцэг эхийн буруугаас 21,7 хувь байна. Цагийн хувьд хичээл эхлэх тарах цагуудад хүүхэд ихээр өртөж байна
.