Аав нь гэртээ ирэхэд хүүхдүүд нь баярлан угтана. Харин энэ үед гэрийн эзэгтэй тэднийг хайрын харцаар ширтэн инээмсэглэнэ. Энэ бол миний, аз жаргалтай гэр бүлийн тухай төсөөлөл. Яг л кино эсвэл клипэнд гардаг шиг монголын мянга мянган гэр бүлүүд эв найртай, халуун дулаан байгаасай гэж би хүсдэг. Харин сүүлийн үед би  ядаж нэг нэгнийгээ алж талдаггүй, хүйтэн мэс бие биедээ хүргэдэггүй байгаасай гэж хүсэх боллоо.

Учир юу вэ гэвэл сүүлийн үед гэр бүлийн хүрээнд бие биенээ алсан, хутгалсан гэх аймшигт хэргүүд ихээр гарсаар байгаа юм.

Тухайлбал тавхан настай хүүгээ заазуураар зүсч гэмтээсэн эцгийн тухай саяхныг хүртэл хэвлэлүүдээр шуугиж хэргийг үйлдсэн эцэг долоон жилийн ял авснаар энэ хэрэг дууслаа. Үүнтэй зэрэгцэн 15 настай өсвөр насны хүү 52 настайгаа эцгийгээ  архи ууж дарамталдаг гэх шалтгаанаар цээжинд нь дөрвөн удаа хутгалан хөнөөсөн хэрэг гарчээ.

Цаашилбал хэд хоногийн өмнө аавдаа хутгалуулсан охины тухай  ч чих дэлсэх боллоо. Тэр дөнгөж 21 настай. Түүнийг Яаралтай түргэн тусламжийн эмч нар Алтай хотхоны 18 дугаар байрны гаражны үүдэнд нүүр нүдээ тэсэртэл зодуулсан, гуяндаа хутгалуулсан байдалтай байсныг эмнэлэгт  хүргэжээ. Тэрээр аавыгаа согтуу ирэхэд нь дургүйцэн эрүүлжүүлэхэд өгнө гэж хэлснийхээ хариуд хутгалуулсан байна. Одоогоор түүний биеийн байдал сайнгүй байгаа бөгөөд эмнэлэгт хэвтэн эмчлүүлж байгаа юм.

Хүний санаанд багтамгүй дээрх хэргүүд архи согтууруулах ундаатай ямар нэгэн сэжмээр холбогддог. Мөн чимээгүй тахал хэмээн нэрлэгддэг гэр бүлийн хүчирхийлэлийн дийлэнх нь архи хэтрүүлэн хэрэглэгчдээс үүдэн гарсан байдаг.

Судалгаанаас үзэхэд өнгөрсөн хоёр жилийн хугацаанд гэр бүлийн хүчирхийлэлд өртөн 41 хүн амь насаа алдсан бөгөөд 916 хүн хүнд, хүндэвтэр гэмтэл авчээ. Хохирогчдын 86,6 хувь нь эмэгтэйчүүд байсан аж. Мөн хүн амины хэргээр хорих ял эдэлж буй 103 эмэгтэйчүүдээс 88 хувь нь байнгын хүчирхийлэл, дарамтын улмаас гэмт хэрэг үйлдсэн гэдгээ мэдүүлэгтээ дурьдсан байдаг.

Энэ тоо болон дээрх аймшигт хэргүүд бол зөвхөн олон нийтэд ил болсон нь. Цус уснаас өтгөн гэдгийн жишгээр гэр бүл хамаатан садны дунд гарсан энэ төрлийн гэмт хэргүүд ихэнхидээ дарагдаж өнгөрдөг байна. Гэхдээ ийм байлаа гээд эхнэр нөхрүүд хоорондоо, аав ээжүүд нь хүүхдүүд рүүгээ, хүүхдүүд нь аав ээж рүүгээ хутга мэс далайхыг зүгээр хараад сууна гэдэг байж боломгүй мэт санагдана.