Баянзүрх дүүргийн 79 дүгээр дунд сургуулийн 5а ангийн ихэр сурагчийн ээж Р.Насанжаргал хэвлэлд ханджээ. Тэрбээр ихэр хүүхдийнх нь ангийн багш Б.Бадамжүгдэр сурагчтайгаа зүй бусаар харилцаж, сургуулиас нь хүртэл хөөсөн тухай гомдол мэдүүлсэн байна. Болсон явдлыг тодруулбал, хоёр ихэр хүүгийн анги удирдсан багш Б.Бадамжүгдэр нь  саван угаалгын нунтаг, ариун цэврийн цаасны мөнгө, анги хуримтлалын 10 мянган төгрөг, сургууль хөгжүүлэх зургаан мянган төгрөг өгөөгүй гэх шалтгаанаар хөвгүүдтэй зүй бусаар харилцаж, гарыг нь самбарын өмнө өргүүлж, чих үснээс нь зулгааж, элдэв муу үгээр доромжилсон байна. Харин ээж нь сургуулиас нэхсэн мөнгийг нь хугацаанд нь биш юм аа гэхэд бүгдийг нь өгдөг гэж ярьж байгаа юм.

Б.Бадамжүгдэр багш нь өмнө нь ч бас хөвгүүдийг сэтгэлийн дарамтад оруулж, элдвээр хэлж зодож байжээ. Тухай бүрт нь ээж нь сургуулийнх нь нийгмийн ажилтанд хандаж байсан байна. 

Ихэр сурагчийн ээж Р.Насанжаргал энэ талаар үргэлжлүүлэн ярихдаа "Энэ удаа анги хамт олных нь дунд нэр төрийг нь гутаан, элдвээр хараан загнаж, ангиасаа хөөсөн байгаа юм. Сэтгэл санааны дарамтад орсон хоёр нялх амьтан айж ичсэндээ янз бүрийн асуудалд өртвөл хариуцлагыг нь хэн хүлээх вэ. Манай хоёр сурлагадаа тааруу нь үнэн. Гэхдээ мэрийлттэй. Гэлээ гээд өөрийнхөө хувийн сургуулиасаа хөөж байгаа аятай аашилсанд эгч нь гомдолтой байна. Сургуулийнх нь захиралд өргөдөл өгсөн. Боловсролын тухай болон Хүүхдийн эрхийг хамгаалах хууль зөрчсөнийг багшид ойлгуулж өгөхийг хүссэн.  Ангийн хүүхдүүд нь хүртэл “Та хоёр мөнгөө өгсөн үү, багшид алуулна даа. Одоо бушуухан яв” гэж хоёр хүүхдэд минь хэлсэн байсан. Багшийн зан авир хүүхдүүдэд нь ингэж тусч байна. Тааруухан сурлагатай байж болох ч улираана, сэтгэцийн өвчтэй хүүхдүүдийн сургууль руу шилжүүлнэ гэж хэлэх эрх байдаг юм уу.

Өнгөрсөн баасан гаригийн өглөө нийгмийн ажилтантай нь холбогдож учир явдлаа хэлтэл “Та санаа зоволтгүй, би хоёр хүүхдийг чинь ангид нь оруулаад өгье” гэхээр нь сургууль руу нь явуулсан. Гэтэл өнөө хоёр маань хичээлдээ ч очоогүй, сураггүй алга болсон байсан. Би ажлаасаа тараад тэр хавиар хайтал автобусны буудал дээр намайг хүлээгээд зогсож байв. Хичээлдээ яагаад яваагүй юм гэтэл “Багш ална, айгаад байна” гэсэн. Хүүхдийг ингэтэл нь сэтгэл санааны дарамтад оруулсан байна шүү дээ. Зөвлөгөө авсан хуулийн зөвлөх “Тэр багш ямар азаар шоронгийн хаалга татчихаагүй юм бэ, танай хоёрт ямар нэгэн юм болсон бол яана” гэж хэлж байсан. Нэхсэн мөнгийг нь өгөхгүй болохоор миний хоёрыг бусдаас ялгаварлан гадуурхах нь зөв юм уу. Сургуулийнх нь сургалтын менежерт энэ тухай хэлсэн. “Та нар өөрсдөө учраа олчихооч дээ” гэхээс өөр арга хэмжээ аваагүй" гэжээ.