Монгол улсын Шадар сайдын 2013 онд баталсан “Олон хүн төвлөрсөн үзвэр, үйлчилгээ, зах, худалдааны байгууллагуудад гүйцэтгэлийн шалгалтын удирдамжийн дагуу нийслэлийн Онцгой байдлын газрын Урьдчилан сэргийлэх хяналтын хэлтсээс шалгалт хийсэн талаар бид мэдээлсэн. Ингээд зарим нэг аж ахуй нэгжүүдийг торгож, заримынх нь үйл ажиллагааг зогсоох хүртэл арга хэмжээ авах болсон байна. Энэ талаар Нийслэлийн онцгой байдлын газрын Гал түймрийн улсын хяналтын ахлах байцаагч С.Эрдэнэбаяраас асууж тодрууллаа.

-Хэдэн байгууллагаар шалгалтыг явуулав?
-Онцгой байдлаас нийтдээ 79 байгууллагад гамшгаас хамгаалах болон гал түймрийн ослын хяналтыг хэрэгжүүлэх хүрээнд шалгалт хийсэн. Ингээд 18 байгууллагын үйл ажиллагааг Галын аюулгүй байдлын тухай хуулийн 6.1.4-т заалт зэргийг үндэслэн зогсоох тухай шийдвэрийг эрх бүхий албан тушаалтанд хүргүүлсэн байгаа. Захиргааны хариуцлагын тухай хуулийн 25.1-ээр үндэслэж 33 субьектийг 4 сая 790 мянган төгрөгөөр торгож захиргааны арга хэмжээ авч ажилласан. Энэ шалгалтын хүрээнд онцгой байдлын байгууллагаас тухайн байгууллагууд дээр сүүлийн гурван үүрэгдсэн зөрчил арилгуулах эрх зүйн баримт бичгийн дагуу тухайн удирдлага холбогдох албан тушаалтан ямар арга хэмжээг авч ажиллаж байгааг шалгасан.

-Тухайлбал ямар байгууллагуудаас зөрчил илэрсэн бэ?
- Шалгалтаар “Улаанбаатар Палас” ХХК-ний “Улаанбаатар Палас” үйлчилгээний төв, “Маамуу нааш ир” тоглоомын төв, “Соёмбо Продакшн Энд Травел” ХХК-ний “Соёмбо” кино театр, “Улаанбаатар Синема” ХХК-ний “Тэнгис” кино театр зэрэг  компаниудаас 24 зөрчил илрүүлж, газар дээр нь таван зөрчлийг арилгуулсан.

-Ер нь нийтлэг ямар зөрчлүүд илэрч байна?
-Зарим нэгэн үзвэр үйлчилгээний байгууллагууд галын аюулгүй байдлын хуулийн 16.1-ийн дөрөвдэхь заалт буюу барилга байгууламжийн хийц, бүтцийг өөрчлөхдөө онцгой байдлын байгууллагаас албан ёсны зөвшөөрлийг авдаг. Тэгвэл эдгээр байгууллага ямар нэгэн зөвшөөрөл авалгүйгээр ажлын зургаа гаргалгүйгээр барилгын хийцээ өөрчилсөн. Мөн барилга байгууламжид байх ёстой гал унтраах автомат төхөөрөмж буюу галын дохиоллын хэрэгсэл суурилагдаагүй мөн ашиглалтын явцад суурилагдсан төхөөрөмжинд нь эвдрэл гэмтэл гарсан зэрэг зөрчлүүд илэрсэн. Түүнчлэн барилгын гадна талд төвийн шугамд гал унтраах автомат машиныг усаар тасралтгүй хангах усны их үүсвэр болох галын гидрант төлөвлөгдсөн байх ёстой. Гэтэл энэ стандартыг зөрчсөн байсан төдийгүй барилгын дотуур усан хангамжийг төлөвлөж өгөөгүй байсан. Зарим худалдааны төв дээр мөн авралтын гарц хааж бараа материал хураасан, лангуу хоорондын зайг алдагдуулж гарцыг нарийсгасан зэрэг зөрчлүүд илэрсэн.

-Нэлээдгүй байгууллагад мөнгөн торгууль тавьсан байсан?
-Монгол Улсын Захиргааны хариуцлагын тухай хуулийн 25 дугаар зүйлийн 25.1 дэх заалтыг үндэслэн “Улаанбаатар Палас” үйлчилгээний төвийг 150.000 төгрөгөөр, Дуурь бүжгийн Эрдмийн театрыг 60.000 төгрөгөөр, Хөх хулганы орон тоглоомын газрын албан тушаалтанг 50.000 төгрөгөөр, нийт 4 субъектыг  260.000 төгрөгөөр торгож захиргааны арга хэмжээ авсан. Харин “Соёмбо” кино театр өмнө нь өгсөн үүрэг даалгаврыг хангалтгүй хийсэн учир үйл ажиллагааг зогсоож, шийдвэр гаргах эрх бүхий албан тушаалтанд үйл ажиллагааг зогсоосон тухай тогтоолыг өгсөн.

-Өөр хэчнээн байгууллагын үйл ажиллагааг зогсоох тогтоол хүргэсэн бэ?
-“Тумбааш” худалдааны төв, “10000 нэрийн барааны дэлгүүр”, “Барс 1.2”, “Хялгант” модны зах, “Гялгар”мод модон бүтээгдэхүүний худалдааны зах зэрэг 18 байгууллагын үйл ажиллагааг зогсоох шийдвэр хүргүүлсэн.