Мэргэжлийн хяналтын байцаагч нарыг авлига авч, хуурамч бичиг баримт үүсгэдэг гэх яриа иргэдийн дунд байдаг. Гэвч хууль хяналтынхнаар шалгуулаад бас олон нийтэд ил болсон булхиа луйвар тэр бүр харагддаггүй. Магадгүй хуулийн байгууллагаар шалгуулж буруутай нь нотлогдож зохих шийтгэлээ авсан байцаагч нар байдаг ч энэ тухай мэдээллийг нууцалдаг байж болох юм. Тэдний авлигын үйлдэл цаагуураа “цэцэглэсээр” байгаа нь ойлгомжтой. Учир нь манайд улсад зөвөөр хөдөлмөрлөөд татвараа төлөөд явж байгаа хүмүүсээс гадна хууль бус үйл ажиллагаа явуулдаг хүн олон шүү дээ. Тэгэхээр тэд энэ үйлдлээ далдлахын тулд, нуухын тулд мэдээж энэ мэт хяналтын байцаагч нарт хэд арван цаасыг нааш цааш болгодог нь тодорхой.

Гэвч “хананд нүд, чих байдаг” гэдэгчлэн хэзээ нэгэн өдөр хэн нэгэн тэднийг илчлэх нь ойлгомжтой юм. Үүний ч баталгаа болгож сүүлийн үед мэргэжлийн хяналтынхан зөвшөөрөлгүй барилгыг хаацайлж, авлига авдаг гэх яриа чих дэлсэх боллоо.

Өөрөөр хэлбэл, Мэргэжлийн хяналтын байцаагч нар Улаанбаатар хотын захирагч Э.Бат-Үүлийн нураах шийдвэр гаргасан барилгыг хүртэл хаацайлж, зөвшөөрөлгүй барилгуудыг улам олшироход нөлөөлдөг гэнэ.
Ганцхан жишээ дурдахад л хэвлэл мэдээллээр Мэргэжлийн хяналтын байцаагч нарын авлига авсан гэх “Тод чоно”  компанийн талаарх мэдээлэл гарах болсон. Тэднээс мэргэжлийн хяналтын төдийгүй өөр албан тушаалтнууд ч их хэмжээний авлига авсан гэж яригдаад байгаа юм.

Ямарч байсан мэргэжлийн хяналтын удирдлагууд  байцаагчдаа АТГ-т ч шалгуулна гэдгээ мэдэгдсэн. Мөн авлига өгсөн гээд байгаа “Тод чоно” компанитай холбоотой материалуудыг ч шалгаж цөөнгүй зөрчлүүдийг гаргажээ. Энэ талаар Нийслэлийн мэргэжлийн хяналтын газрын дэд дарга М.Баасандорж хэлэхдээ “”Тод чоно” компани 2007, 2008 онуудаас эхлэн улсын байцаагч нартай холбоо тогтоон зөрчил дутагдлаа хаацайлуулж байсан асуудал байна. Энэ компанитай холбоотой зөрчил нэлээдгүй байна. Тухайлбал, гадаадын иргэдийн хөдөлмөр эрхлэлтийн байдал, ажиллах хүч оруулж ирэх квотын асуудлыг нь судлуулахаар холбогдох байгууллагад хүсэлт тавиад байгаа.  Мөн алдаа дутагдал, авлигатай нэр холбогдсон улсын байцаагч нартай хуулийн хүрээнд хариуцлага тооцох болно. Түүнчлэн улсын байцаагчийн ёсзүй, ажлын алдаа дутагдал их ирж байна. Урьд хохирсон гэх иргэд ч хандаж эхэлсэн” гэв.

Ямартаа ч төрийн нүд чих болсон байгууллагын нэгд яахын аргагүй багтах газар бол Мэргэжлийн хяналт. Энэ байгууллага үүсгэн байгуулагдаад арав гаруй жил болж байна.  Гэтэл өдгөө ганцхан барилга дээр л ийм хэмжээний булхай илэрч байгаа юм чин нүдэнд үзэгдэж, чихэнд сонсогдоогүй хэд байгааг таамаглашгүй юм.