Оюуны хөгжил ТББ-аас өнөөдөр “Бөөгийн ёс зүй” сэдэвт эрдэм шинжилгээний бага хурлыг зохион байгууллаа. Манай улсад 4 мянга гаруй өрх, 20 мянга хувь хүн бөөтэй ямар нэгэн байдлаар хамааралтай гэсэн судалгаа байдаг байна.  Эдгээр хүмүүсийн 70 орчим хувь нь бөө болох буюу бөөд үзүүлдэг аж. Харин бөө нарын 50 хувь нь ямар нэгэн байдлаар архинаас хамааралтай болсон байдаг байна. 

Мөн Бөө нараас зөвлөгөө авах гэж хамаг эд хөрөнгөө барж дууссан хүмүүс ч байдаг гэнэ.

Сүүлийн үед бөө нарыг залилан хийж ард түмний мөнгийг авдаг гэж хүмүүс ярих болсон. Тэгвэл энэ талаар өнөөдрийн зөвлөгөөнд орсон хүмүүс ярихдаа “Чаддагүй хүмүүс бөөгийн нэр хүндийг унагадаг. Мөнх тэнгэрийн ёс зүй гэж байдаг бөгөөд түүний дагуу ажиллах хэрэгтэй” гэсэн юм. Нөгөө талаар бөөгийн үйл хэргийг үнэн зөвөөр мэдээлэх албан ёсны сургалт байхгүйгээс болж хүмүүс буруу мэдээллийг авсаар байгаа гэлээ. Тиймээс бөө нар бөөгийн нэгдсэн мэдээллийн төвтэй болгож өгөхийг хүссэн албан шаардлагыг Ерөнхийлөгч, ССАЖ-ын яаманд хүргүүлэхээр болжээ. Мэдээллийн нэгдсэн төвтэй болбол хүмүүс бөө нарын талаар үнэн зөв мэдээлэлтэй болохоос гадна хэнд, хаана хандахаа мэддэг болох боломжтой гэв. Хэрвээ бөөгийн мэдээллийн нэгдсэн төвтэй болохыг зөвшөөрвөл тус ажлыг ганц ССАЖ-ын яаманд даатгахгүйгээр бөөгийн холбоо, бөөгийн үйл ажиллагаа явуулдаг ТББ нэгдэж хамтарч ажиллана гэлээ.