Тамхи импортологч болон үйлдвэрлэгч аж ахуй нэгжүүдэд хяналт шалгалтын ажлыг ШӨХТГ-аас хийжээ. Тус хяналт шалгалтанд “Газар сүлжмэл” ХХК, “Алтангадас трейд” ХХК, “Алтанжолоо трейд” ХХК, “Престиж суплайз инк” ХХК, “Монгол тамхи со” ХХК, “Монгол тамхи интернешнл” ХХК гэсэн аж ахуй нэгжүүд хамрагдсан байна. Шалгалтаар “Алтангадас трейд” ХХК-ийн БНСУ-аас импортоор оруулж ирдэг “ESSE LIGTHS” нэрийн тамхиний үйлдвэрлэсэн хугацаа нь 2015 оны 4 сарын 15-нд гэж бичигдсэн зөрчил илэрсэн тул тус компанид 5.0 сая төгрөгийн торгууль ногдуулжээ. Агуулахад хураалттай байгаа 2800 хайрцаг зөрчилтэй тамхийг худалдаалахыг түр зогсоож худалдаанд гаргасан зөрчилтэй тамхиудыг буцаан татуулах, санамж наалгахаар болсон байна. Тэгэхээр бүх “ESSE LIGTHS" гэх тамхи он сарын доголдолтой байсныг хэрэглэгчиддээ анхааруулж байна. Энэ талаар Хэрэглэгчийн эрхийг хамгаалах хэлтсийн дарга Ч.Батбаатараас тодрууллаа.

-Тамхины он сарын 2015 он болгож бичсэн нь ямар учиртай болохыг тогтоосон уу?
-Тухайн компаниас Солонгост уг тамхийг үйлдвэрлэдэг хайрцаг үйлдвэрлэгчийн буруу гэж тайлбарласан. Уг нь тамхийг 1.5 жил хадгалах хугацаатай байдаг юм билээ. Гэтэл энэ тамхийг 2015 он хүртэл зарах боломжтой болчихоод байна.

-Үүнийг “Алтангадас трейд” ХХК мэдээгүй байсан хэрэг үү?
-Мэдсэн. Улмаар МХЕГ-аар шалгуулсан байдаг. Тэгсэн ч үүнийг зарж борлуулсаар байсан байгаа юм. Тиймээс бид МХЕг болоод хил гаалийнхан руу албан бичиг явуулсан. Хилээс ирсэн албан тоотод "Бид МХЕГ-ын гаргасан дүгнэлт дээр үндэслэж оруулж ирж байгаа" гэсэн тайлбарыг тавьж байгаа. Тиймээс бид МХЕГ-т ийм хариуцлага алдсан этгээдтэй хариуцлага тооц гэсэн албан шаардлагыг хүргүүлчихээд байна. Одоогоор хариу ирээгүй байна.