Монголын иргэний нийгэм, залуучуудын байгууллагын төлөөллүүд улаанбаатар хотыг дэлхийн жишигт нийцсэн унадаг дугуйн замтай болгох зорилготой “Унадаг дугуйтай Улаанбаатар” төслийн талаар өнөөдөр сэтгүүлчдэд мэдээлэл хийлээ.

Төслийг гурван жилийн хугацаанд Монголын залуучуудын холбоо, Нийслэлийн ерөнхий төлөвлөлтийн газар, Монголын авто замчин залуучуудын холбоо, Монголын дугуйн холбоо зэрэг олон байгууллага хамтран хэрэгжүүлэх юм.

Дугуйн замтай болсноор нийслэл хотын өмнө тулгамдаж буй агаарын бохирдол, авто машины түгжрэл зэргийг тодорхой хэмжээнд бууруулахаас гадна иргэдийн эрүүл мэнд, дугуйн спортын хөгжилд чухал ач холбогдолтой аж. Энэ төслийн хүрээнд нийслэлд нийт 143,7 км унадаг дугуйн зам, 99 дугуйн зогсоол тавигдахаар төлөвлөсөн байна. Ингэхдээ тэд хаана, хаана тавигдаж болохыг нарийн тооцоолжээ.

Түүнчлэн энэхүү төслийг хэрэгжүүлэхийн өмнө иргэдэд дугуйн замын ач холбогдлыг таниулах үүднээс өдөрлөг зохион байгуулах гэж байна. Өдөрлөг  ирэх ням гарагт Чингис хааны талбайд болох бөгөөд олон зуун дугуйчид энэ өдөрлөгт оролцож сонирхолтой дугуйн үзүүлбэрүүдийг толилуулах аж.

Өдөрлөгийн үеэр  дугуйн замтай болохыг хүсч буй эсэх талаар иргэдийн дунд санал асуулга явуулах юм. Төсөл хэрэгжүүлэгчдий хэлж буйгаар төслийг УИХ-д өргөн барихдаа  20 мянган иргэний дэмжсэн саналын хамт хүргүүлэхээр санал аваад эхэлжээ. Ингээд төслийг “УИХ дахь залуучуудыг дэмжих лобби бүлэг”-ээр дамжуулан УИХ-ийн ээлжит чуулганд өргөн барьж, шаардагдах хөрөнгө мөнгийг 2014 оны төсөвт суулгуулахаар  төлөвлөсөн байна.