Өнгөрөгч 2012 оны 11 сард “НИК” ХХК-ийг зохиомол хомсдол үүсгэсэн гэж Шударга өрсөлдөөн, хэрэглэгчийн төлөө газраас 4.9 тэрбум төгрөгөөр торгосон. Энэ асуудал жил тойрон шүүхээр хэлэлцэгдээд Улсын дээд шүүхээс эцсийн шийдвэр гарсан. Гэтэл “НИК” ХХК-тай холбоотой энэ асуудал эцсийн байдлаар хэрхэн шийдэгдсэн, торгууль төлөгдөх эсэх талаар нийгэм, олон нийт янз бүрээр ярьцгааж байна.

Тиймээс энэ асуудлаар Шударга өрсөлдөөн, хэрэглэгчийн төлөө газрын дарга О.Магнайгаас зарим зүйлийг тодрууллаа.

-“НИК” ХХК-ийг зохиомол хомсдол үүсгэсэн гэж танай байгууллагаас ногдуулсан 4.9 тэрбум төгрөгийн торгуулийн асуудал хэрхэн шийдэгдсэн юм бэ? Олон нийтийн дунд энэ талаар янз бүрээр яригдаж байна.

-Сүүлийн үед энэ талаар хэвлэл мэдээлэлийн хэрэгсэлээр ч тэр, олон нийтийн дунд ч тэр нилээд буруу ойлголт төрүүлэхээр мэдээлэл гараад байсан. Тиймээс энэ талаар асууж ирсэнд баярлалаа. Олон нийтэд хийсэн ажлынхаа үр дүнгийн талаар үнэн зөв ойлголт, мэдээлэл өгөх нь чухал юм.

Болсон явдлыг эргээд нэг сануулахад өнгөрсөн 2012 оны 11 сард “НИК” ХХК шатхууны нөөц дууссан гэх шалтгаан хэлж борлуулалтаа гэнэт хязгаарласныг бид бүгдээрээ санаж байгаа.

Энэ үйлдлийг нь манай байгууллага шалгахад тухайн үед уг компанид шатахууны хангалттай нөөц байсаар байтал борлуулалтаа зохиомлоор хязгаарласан болох нь тогтоогдсон. Тиймээс уг үйлдлээрээ Өрсөлдөөний тухай хуулийг зөрчсөн гэж үзээд уг компанид 4.9 тэрбум төгрөгийн торгууль ногдуулсан юм.

    Гэтэл “НИК” ХХК Шударга өрсөлдөөн, хэрэглэгчийн төлөө газрын гаргасан дээрх шийдвэр, 4.9 тэрбум төгрөгийн торгуулийг үл зөвшөөрч шүүхэд нэхэмжлэл гаргаад өнгөрсөн жил орчмын хугацаанд 3 шатны шүүхээр уг маргаан хэлэлцэгдэж өнгөрөгч 7 хоногт Улсын дээд шүүхээс эцсийн шийдвэр гарсан.

Шүүхээс гарсан эцсийн шийдвэрийн гол агуулгыг тайлбарлавал “НИК” ХХК-ийг зохиомлоор шатхууны хомсдол үүсгэж буюу шатхуун байсаар байтал борлуулалтаа хязгаарлан Өрсөлдөөний тухай хуулийг зөрчсөн гэж үзсэн Шударга өрсөлдөөн, хэрэглэгчийн төлөө газрын шийдвэрийг хуульд нийцсэн гээд хүчин төгөлдөр хэвээр үлдээсэн юм.

    Өөрөөр хэлбэл, “НИК” ХХК Өрсөлдөөний тухай хуулийг зөрчсөн гэдэг нь эцсийн байдлаар, ямар ч маргаангүйгээр тогтоогдсон гэсэн үг.

   - Тэгвэл 4.9 тэрбум төгрөгийн торгууль улсын төсөвт төлөгдөхөөр болсон гэж ойлгож болох уу?

-    Өрсөлдөөний тухай хуулийг зөрчсөн болох нь нэгэнт эцсийн байдлаар, ямар ч маргаангүйгээр тогтоогдсон тул “НИК” ХХК-д ногдуулсан торгууль улсын төсөвт төлөгдөх нь эргэлзэх зүйлгүй гарцаагүй асуудал гэдгийг юу түрүүнд хэлмээр байна.

    Гэхдээ “НИК” ХХК-д ногдуулсан 4.9 тэрбум төгрөгийн торгуулийн хувьд шүүхээс уг торгуулийг дахин тогтоож “НИК” ХХК-д ногдуулах шаардлагатай гэж үзсэн тул торгууль ногдуулсан шинэ акт гартал биелэлтийг түр түдгэлзүүлсэн юм. Өөрөөр хэлбэл, “НИК” ХХК-д ногдуулсан торгуулийг дахин тогтоож шинээр ногдуулахыг шүүхээс манай байгууллагад даалгасан.

    Тодруулбал, тухайн үед “НИК” ХХК нь зөвхөн АИ-92 маркын автобензин, дизелийн түлш гэсэн 2 бүтээгдэхүүнд л зохиомол хомсдол үүсгэж, борлуулалтыг хязгаарлаж байсан тул зөвхөн уг 2 бүтээгдэхүүний борлуулалтын орлогоос хувь тооцож торгуулийн хэмжээг шинээр тогтоож “НИК” ХХК-иар гүйцэтгүүлэхийг шүүхээс манай байгууллагад даалгаад байна.

    Тиймээс олон нийтийн дунд тархаад байгаа “НИК” ХХК-д ногдуулсан 4.9 тэрбумын торгууль огт төлөгдөхгүй, шүүхээс хүчингүй болгосон гэсэн ойлголт андуу ташаа болохыг албан ёсоор хэлмээр байна.

   - Тэгэхээр танай байгууллагаас “НИК” ХХК-д дахин хяналт шалгалт хийж торгуулийг тогтооно гэсэн үг үү?

   - Тэгэж ойлгож болохгүй. Хяналт шалгалтыг хийхдээ аливаа этгээд хууль зөрчсөн эсэхийг тогтоох зорилгоор хийдэг. Харин энэ тохиолдолд “НИК” ХХК-ийг хууль зөрсөн болохыг эцсийн байдлаар нэгэнт тогтоочихсон гэдгийг би дээрхэлсэн. Одоо энэ талаар хэн ч ямар ч маргаан үүсгэх боломжгүй.

    Шүүхийн эцсийн шийдвэр нэгэнт торгуулийг шинэчилэн тогтоож “НИК” ХХК-иар гүйцэтгүүл гэж гарсан тул манай байгууллагын зүгээс “НИК” ХХК-ийн АИ-92 маркын автобензин, дизелийн түлш гэсэн 2 бүтээгдэхүүний тухайн оны борлуулалтын орлогын нийт дүнг холбогдох баримт дээр тулгуурлан үнэн зөв тогтоож түүнээс хувь тооцон торгуулийг шинэчилэн тавина.

Уг 2 бүтээгдэхүүний борлуулалтын орлогын нийт дүн үнэн зөвөөр тогтоогдох боломжгүй тохиолдолд хуульд заасны дагуу “НИК” ХХК-ийн өөрийн хөрөнгөөс хувь тооцож торгуулийн хэмжээг тогтоож ногдуулна.

    Бидний зүгээс шүүхийн шийдвэрийн дагуу “НИК” ХХК-д шинээр ногдуулах торгуулийн хэмжээг өмнө ногдуулсан торгуулийн хэмжээ буюу 4.9 тэрбум төгрөгийн хэмжээнээс бууруулахгүй гэсэн байр суурьтай байгаа.

-Тэгэхээр энэ шинээр тогтоон ногдуулах торгуулийг яг хэзээ тавьж мөн хэзээ улсын төсөвт төлүүлэх вэ?

-Бидний зүгээс торгуулийн хэмжээг шинэчилэн тогтоохоор ажиллаж байна. Тун ойрын хугацаанд торгуулийн хэмжээг тогтоон “НИК” ХХК-д ногдуулж, тухайн үед нь олон нийтэд мэдээлэх болно.

Торгууль ногдуулсан тухай шийдвэрийг “НИК” ХХК хүлээн авсан өдөрөөсөө хойш 15 хоногийн дотор сайн дураараа төлөх үүрэгтэй бөгөөд энэ хугацаа өнгөрөхөд торгуулийг төлөөгүй бол бид шүүхийн шийдвэр гүйцэтгэх журмаар албадан гүйцэтгүүлж улсын төсөвт төвлөрүүлэх болно.