ШӨХТГ-аас өнгөрсөн хоёр долоо хоногт хийгдсэн ажлынхаа талаар тайлагналаа. Энэ үеэр Хэрэглэгчийн эрхийг хамгаалах хэлтсийн дарга Ч.Батбаатараас хэдэн зүйл тодрууллаа.

-Нийслэлийн хэмжээнд үйл ажиллагаа явуулж байгаа Вьетнам авто засварын газруудад дүүргийн ЗДТГ-тай хамтран гүйцэтгэлийн хяналт шалгалт хийж байгаа гэсэн. Шалгалтын явцын талаар?

 -Шалгалтаар засвар, үйлчилгээнийхээ ажлын үнэ тарифыг хэрэглэгчдэд ойлгомжтой, ил тод байрлуулах, хийгдсэн засвартаа баталгааны хуудас олгож байх талаар өмнө нь өгөгдсөн албан шаардлагын биелэлт хангалтгүй байгаа нь тогтоогдсон. БЗД-ийн нутаг дэвсгэрт дөрвөн вьетнам авто засварын газрын үйл ажиллагааг түр зогсоож, иргэний бичиг баримтын зөрчилтэй хоёр Вьетнам иргэнийг цагдаагийн байгууллагад шилжүүлж, зөрчилтэй байсан “ББ-Од” ХХК, “Ханой-Өргөө” ХХК, “Висом” ХХК-иудад 1 сая 720 мянган төгрөгийн торгууль ногдуулсан.

-Зөрчлөө арилгасан газар алга уу?
-Гурван газар байсан.  Мөн нийслэлд үйл ажиллагаа явуулж байгаа томоохон супермаркетуудын лангууны үнэ кассын үнэ ялгаатай байдагтай холбоотойгоор хэрэглэгчдээс ирсэн гомдлын дагуу шалгалт хийсэн.

-Ямар дэлгүүрүүдэд шалгалт хийсэн бэ?
-“Оргил”, “Номин”, “Миний дэлгүүр”, “Макс”, “Баясах”, “Замбала” зэрэг супер маркетуудад хяналт шалгалт хийсэн. Уг шалгалтаар зарим дэлгүүрүүдэд кассын үнэ лангууны үнэ зөрсөн зөрчил ихээр илэрсэн.

-Яг ямар дэлгүүрүүдээс хэчнээн зөрчил илэрсэн бэ?
-Чингэлтэй дүүргийн нутаг дэвсгэрт байрлах “Баясах-32” дэлгүүрээс 26 нэрийн барааг сонгон авч үзэхэд 10, “Замбала” дэлгүүрээс 23 нэрийн бараа сонгосноос 9 барааны үнэ зөрүүтэй байсан.  Өөрөөр хэлбэл 1200 төгрөгөөр зарагдаж байгаа бараа кассан дээр очиход 1800 болсон байх жишээтэй. Энэ бол хууль бус худалдааны арга хэрэглэсэн гэсэн заалтаар торгох үндэслэл болж байна. Мөн “Миний дэлгүүр”-ээс18 бараа бүтээгдэхүүнийг худалдан авахад 8 ширхэг нь үний зөрүүтэй гарсан. Бусад нь ганц, хоёр ширхэг үнийн зөрүүтэй зөрчил илэрсэн.

-Ямар хариуцлага ноогдуулсан бэ?
-Хууль бус худалдааны арга хэрэглэсэн гэж үзээд 10 сая хүртэлх хэмжээнд торгох хариуцлага тооцогдоно.

-Харин тухайн дэлгүүрийн удирдлагууд ямар шалтаг тоочиж байх юм?
-Кассан дээр буруу биччихэж, манай кассчин буруу товчлуур дарсан байна гэх мэт зүйл ярьж байна лээ.

-Тэгвэл үнийн зөрүүнээс гадна зөрчил хэр байна. Тухайлбал "Миний дэлгүүр" бол байнга шахуу зөрчил гаргадаг шүү дээ?
-Ер нь бол "Миний дэлгүүр" сүлжээ дэлгүүрүүд дээр ирдэг гомдлуудаас хэлэхэд, хугацаа нь дууссан бараа, хаяг шошгоны асуудал их яригддаг.

Ойрын ШӨХТГ-аас ямар ажиллагаа явуулах гэж байна?
-Нийслэлд үйл ажиллагаа эрхэлж байгаа жолооны курсуудын сургалтын орчин, чанар, багшлах боловсон хүчний хангамж болон үйл ажиллагаа нь суралцагчийн хэрэгцээ шаардлагыг хангаж байгаа эсэхэд ЗЦГ-тай хамтран хяналт шалгалт хийнэ. Нэг жилд авто тээврийн ослоор Монголд 500 хүн амиа алддаг гэсэн статистик судалгаа байдаг. Үүнээс 60 орчим хувь нь бага насны хүүхдүүд байдаг. Тэгэхээр энэ бол гамшгийн асуудал. Тиймээс бид шалгалт хийх гэж байна.

-Иргэдээс ямар гомдол түлхүү ирж байна?
-Жолооны курсууд төлбөрөө л төлсөн бол үнэмлэхийг нь өгдөг гэсэн гомдол ирдэг.  Мөн нийслэлийн тээврийн газартай хамтран бага оврын автобуснуудын үйл ажиллагаа, үйлчилгээний соёл, үнэ тариф, гэрээний үүргийн биелэлтэд хяналт шалгалт хийнэ. Микро автобуснууд өдрийн цагаар 500 төгрөгөөр явж байгаа хэрнээ орой 1500 төгрөгөөр явдаг гэх иргэдийн гомдол байдаг.