“Мобиком”-ын луйвар нэг нэгээрээ, хэд хэдээрээ гарч ирсээр. Урлаг соёлынхны оюуны өмчийг зөвшөөрөлгүй ашиглаж овоо хэдэн төгрөгний ашиг хийсэн л гэх, иргэдийн итгэл үнэмшил дээр ажиллаж байна л гэх зүйл улиг болтлоо яригдсан. Тэд ч бүр ийм зүйл сонссоор дүжирсэн биз. Уг нь аливаа байгууллага үйл ажиллагааг нь шүүмжилсэн иргэдийн дуу хоолойг анхааралтай сонсож,  ажил хэрэг болгох үүрэгтэй. Гэвч “Мобиком” гэх хүнд суртлын “үүр” хэн ч юу ч гэж байсан үл анзаарч байдаг нь нууц биш. Уг нь “хэрэглэгч хаан” гэдэг үгийг эрхэм болгосон үйлчилгээний байгууллага хэрнээ хэрэглэгчдээ мэдэрч чаддаггүй. Тэднийг шүүмжилсэн, үйл ажиллагааных нь доголдлыг хэлсэн мянга мянган хэрэглэгч байдаг. Гэвч “Мобиком”-ынхон чихээ дарж, нүдээ аниж, амаа жимийсээр.

Сүүлдээ бүр  тодорхой хяналтыг тавьж байх албан байгууллагуудыг үл тоомсорлож байх жишээтэй. Хэрэглэгчид хаашдаа биднийг сонгосон, бид анхдагч гэх өчүүхэн бодлоороо луйврын бизнесээ үргэлжлүүлсээр байдаг.

Иргэд “Мобиком”-оос мөнгөөрөө нэгж худалдаж авчихаад ах дүү, хамаатан, найз нөхөддөө өгөхөөр давхар нэгж унаад байна. Мөн  “Card plus” гэх үйлчилгээг  15 мянган төгрөгөөр сарын турш сүлжээндээ үнэ төлбөргүй ярих эрхтэй гэдэг ч 20 эсвэл 25 хоноод л эрх нь дуусчихдаг. Түүнчлэн, дараа төлбөрт хэрэглэгч болохын тулд барьцаа мөнгө өгдөг явдал иргэдийг шулж байгаа үзэгдэл гэх мэтээр байнга шүүмжилдэг.

Харин “Мобиком” хэн нэгэнд ашиглуулна гэж ер байхгүй шүү. Иргэд та бүхэн “Мобиком”-ын гэрээт борлуулагч гэдгийг сайн мэднэ шүү дээ. Өөрөөр хэлбэл энд тэнд “Мобиком”-ын гэрээт борлуулагч гэсэн тодотголтой дэлгүүр, “ТҮЦ”-үүд байдаг. Бид тэдгээр гэрээт борлуулагчдаас нэгж худалдаж авч, тэд бидэнд зардаг. “Мобиком”-ын гэрээт борлуулагч гэхээр л овоо хэдэн төгрөгний ашигтай ажилладаг мэт худалдан авагчид санадаг. Гэвч “Мобиком”-ын зүгээс хөөрхий тэдгээр бизнес хийж амжиргаагаа дээшлүүлэх гэж байгаа хүмүүст ашиг гэх зүйл өгдөггүй.

Нэг л том байгууллага, нэг л ашигтай газар. Тэгсэн хэрнээ ард иргэдийнхээ ядаж цөөнхөд ч болов хүртээлтэй зүйл хийдэггүй. Тэд гэрээт борлуулагчдаараа дамжуулж хэдэн тэрбумаар нь ашиг олж байгаа шүү дээ. Гэвч “Мобиком”-ын гэрээт борлуулагчид өөрсдөө тэр ашгийг олж чаддаггүй. Тэд хэдэн ч төгрөгний нэгж зарахаар авсан бай тэрнийхээ 3-хан хувийг л авдаг гэж байгаа. Өөрөөр хэлбэл 100000 мянган төгрөгний нэгж авлаа гэхэд 3000 төгрөг л "Мобиком"-оос авдаг гэсэн үг.  Тэр нь бараг "Мобиком"-руу очиж, буцахын автобусны зардал гэхэд болно.

Мөн  “Мобиком” гэрээт борлуулагчийн гэрээ байгуулахаар очсон хүмүүстээ их л сонин болзол тавьдаг байгаа юм. Энэ нь зарагдахгүй байгаа хэдэн дугаараа зарах. Хүмүүс “Мобиком”-ын гэрээт борлуулагч болсон л бол 5-10 ширхэг шинэ дугаар авч зарах ёстой. Тэдгээр дугаар нь бүгд 94......-тэй хамгийн сүүлд гарсан дугаарууд. Гэрээт борлуулагч өөрийн сонголтоор ч тэдгээр дугаарыг авдаггүй гэж байгаа. Теллер эмэгтэй шууд л ямар ч хамаагүй хэдэн тооны цуглуулга болсон 10 дугаарыг гэрээт борлуулагчид шахдаг.  Бас болоогүй тэдгээр 10 дугаараа 4500 төгрөгөөр борлуулагчид худалдаалдаг. Тэгсэн хэрнээ өөрсдөө 94......-тэй дугаар 4000 боллоо гээд реклам цацаад байдаг. Ингэж хүнийг ашиглаж зарагдахгүй байгаа бараагаа шахна гэдэг арай л дэндэж байгаа хэрэг биш үү. Нөгөө гэрээт борлуулагчид нь ашиггүй ч гэсэн хэдэн хэрэглэгчдээ татахын тулд өнөөх борлуулагдахгүй барааг нь мөнгө төлөөд авдаг.

Энэ бол "Мобиком"-ын иргэдийн нүдэн дээр ил задгай явуулж байгаа увайгүй үйлдэл. Харин үүний цаана далд луйврууд ёстой л цэцэглэн дэлбээлж байгаа гэхэд хэлсдэхгүй.