Нийслэлийн иргэдийн төлөөлөгчдийн хурал дахь МАН-ын бүлгийн гишүүд өнөөдөр гэр хорооллын дахин төлөвлөлтийн талаар мэдээлэл хийлээ.

Тэд дахин төлөвлөлтийн барилгын ажлын явцын мэдээлэл бүрхэг, одоогоор хэдэн өрхийн газар чөлөөлсөн, газрын нөхөн олговор зохих эзэддээ хүрсэн эсэх нь тодорхойгүй хэмээн үзэж байгаа юм. Мөн төслийг хэрэгжүүлэгч компаниудын туршлага хөрөнгийн баталгаагүй байгаад тэд санаа зовж байгаа илэрхийлээд энэ тал дээр  нийслэлийн удирдлагууд иргэдэд  баталгаа гаргаж өгөхийг санал болгож байгаа гэнэ. Тодруулбал иргэд газраа чөлөөлөөд барилгын компаниудад өглөө гэхэд ямар нэгэн эдийн засгийн болоод бусад шалтгаанаар барилга босохгүй бол хохиролыг хотын удирдлагууд бүрэн хариуцахыг батламжид илэрхийлсэн байх аж

Мөн тэд хотын дарга Э.Бат-Үүлд шаардлага хүргүүлэх тухайгаа мэдэгдсэн юм. Энэ талаар НИТХ-ын МАН-ын бүлгийн дарга Д.Амарбаясгалан “Бид газар дээр нь очиход иргэд газраа заавал зарах ёстой гэсэн дарамтанд орчихсон байдалтай сууж байсан. Иргэдийн мэдээлэл дутуу байдлыг төслийнхөн ашиглаж байгаа болж таарч байна. Энэ хүрээнд бид шаардлага хүргүүлэхээр болсон. Бидний шаардлага бол ямарваа нэгэн бүтээн байгуулалтын ажлыг хойш татах биш, нийслэлийн бүтээн байгуулалтыг аль болох хурдацтай урагшлуулах ёстой гэсэн дүгнэлт хийгээд өнөөдөр бид Э.Бат-Үүл даргад шаардлага болон батламж гаргаж өгөх хүсэлтээ хүргүүлнэ” гэв.

Дашрамд дуулгахад Гэр хорооллоос НИТХ-д сонгогдсон МАН-ын бүлгийн гишүүд 7-14 хоногт гэр хорооллын дахин төлөвлөлтөөр сэтгүүлчидтэй байнга уулзаж байхаар болжээ.