Манай хотын удирдлагууд гурван тэрбумаар “Азийн цагаан дагина” нэртэй гялгар уут үйлдвэрлэж, 85 сая төгрөгөөр хэний ч мэдэхгүй нэг орос хүний хөшөөг босгох гэж байгаа. Дээрх ажлууд дээрээ нэмээд гурван тэрбумаар “Чингисийн талбай”-н гэрэлтүүлгийг хийж байгаа аж.

Эдийн засаг хүндэрч, улсын төсөв 1.5 их наядаар тасраад буй энэ үед үр, ашиггүй зүйлд төсвийн мөнгийг энэ мэтээр хэт үрэлгэн байдлаар зарцуулж байгаа нь олон хүний бухимдлыг төрүүлж эхэллээ.

Гурван тэрбум төгрөгөөр юу хийж болох вэ. Арван цэцэрлэг, эсвэл дөрвөн сургууль барьж болно.  2013 он улсын төсөвт 100 гаруй хүүхэд хүмүүжих  нэг цэцэрлэг барихад 280 сая төгрөг төсөвлөсөн гэж тооцоолбол гурван тэрбум төгрөгөөр 10 цэцэрлэг барих боломжтой гэсэн үг. Тэгвэл “Чингисийн талбай”-н 22-хон гэрэлтүүлгийг гурван тэрбум төгрөгөөр сольж байна цаана чинь.

Нийслэлийн удирдлагууд хотын гудамжуудыг гэрэлтүүлэгтэй болгох ажлын хүрээнд өнгөрсөн хавраас уг ажлыг эхлүүлсэн. “Чингисийн талбай”-н хуучин шар гэрэл нь 10 гаруй жил болсон учраас өнгө үзэмж, гэрэлтүүлэх чанар нь муудаж, шаардлага хангахгүй болсон гэнэ. Одоо харин шинээр суурилуулж буй нь “Philips” компанийн лед гэрэл юм байх. Эрчим хүчний хэмнэлттэй, ашиглалтын хугацаа урт, орчин үеийн жишигт нийцсэн бөгөөд гүйцэтгэгч компани нь таван жилийн баталгаа өгч байгаа гээд давуу тал олонтой гэж ярьж байна. Уг ажлыг Нийслэлийн Хөрөнгө оруулалтын газрынхантай гэрээ байгуулсны үндсэн дээр “Синтино лайтинг” компани  гүйцэтгэж байгаа юм байна. Тэгээд энэ долоо хоногт ажлаа бүрэн дуусаж, ашиглалтад хүлээлгэн өгөх аж. Долоо хоногийн дараа нийслэлийн иргэд "Чингисийн талбай"-д ирж гурван тэрбумаар сольсон гэрлүүдийг харж болох юм байна.

Мэдээж, хотоо гэрэлтэй болгох нь сайхан. Гэхдээ “Чингисийн талбай”-н 22-хон гэрлийг гурван тэрбумаар сольж байдаг ямар баян улс вэ манайх чинь. Гурван тэрбумаа 22-т хуваагаад бодоод үзэхэд л хэн ч итгэхээргүй тоо гарна. Эсвэл лед гэрэл гэхээрээ тийм үнэтэй байдаг эд үү. Энэ гурван тэрбумаар 10 цэцэрлэг барьсан бол хичнээн хүүхэд гэртээ цоожлогдохоос аврагдах байсан бол.

Үгүй дээ гэхэд, шөнө орой тас харанхуй гудамжинд бүдчиж яваа гэр хорооллынхонд гурван тэрбумын гэрэл чинь илүү хэрэгтэй байгаа шүү дээ.  Нийслэлийн гэр хорооллын дийлэнх нь өнөөдөр гэрэлгүй гудамжтай. Тэр харанхуй гудамжинд л дээрэм, айдас хүйдэс байдаг. Шөнө архичин согтуучууд, нохой шувуунаас айсан охид эмэгтэйчүүд тэр л харанхуй гудамжинд чинь явж байдаг.

Сураг сонсох нь дахин 3.6 тэрбум төгрөгөөр хотын гудамжинд гэрэл тавина гэж байсан. Тэгвэл тэр гурван тэрбумын гэрэлээ захын гэр хорооллууд тавиад өгөөрэй.