“Нарантуул” худалдааны төвийн хүнсний захын үндсэн түрээслэгчдийн төлөөлөл дөнгөж сая мэдээлэл хийлээ. Энэ үеэр түрээслэгч зарим зүйлийг тодрууллаа.

-“Нарантуул”-ын галын дүгнэлт, хохирлын хэмжээ гарсан гэсэн . Үнэн үү?
-2013 оны наймдугаар сарын 23-нд “Нарантуул” хүнсний зах хоромхон хугацаанд шатаж дууссан. Ингээд 55 хоног өнгөрөх хугацаанд галын дүгнэлт гарсан зүйл бол байхгүй байна. Гэвч одоогоос хоёр, гурван хоногийн өмнө богино холбоо үүсч “Нарантуул” зах шатсан, Прокурорын байгууллагад хэрэг нь шилжсэн гэсэн мэдээллүүд гарсан. Тэгвэл энэ нь худал ташаа мэдээлэл юм.

-55 хоногийн хугацаанд ажилгүй байлаа. Энэ хугацаанд наймаагаа хийж байсан бол овоо л орлого олсон байх байсан биз дээ?
-Ямар ажил үйлчилгээ эрхэлдгээсээ өөр өөр. Тэдгээрийг хувь хүмүүс дотроо бодоод л тооцоолоод л явж байгаа.

-"Нарантуул" даатгалтай байсан талаар мэдэж байгаа юу?
-Тэрийг сайн мэдэхгүй. Харин түрээслэгчид нь хувиараа даатгал хийлгэж байсан зүйл бол байгаа.

-Та нартай удирдлагууд чинь холбоотой байгаа юу?
-Үндсэн түрээслэгчид бидний зүгээс холбогдох хуулийнхан хийгээд, “Нарантуул” захын удирдлага, менежертэй хамтран ажиллаж байгаа. Ингэхдээ бид төлбөр хийгээд янз бүрийн зүйл нэхээгүй. Харин хурдан хугацаанд ажлын байр барьж өгөөч гэсэн мэдэгдлийг 2-3 удаа өгсөн байгаа. Үүний хариуг ч захын удирдлагууд маань өгсөн. Хүйтэн сэрүүнээс өмнө амжуулж барилгаа барина л гэсэн.

-“Нарантуул”-ын удирдлагууд 5 давхар худалдааны төв барьж тийшээгээ хохирсон түрээслэгчдээс оруулна гэж тохирч байгаа гэсэн яриа байна. Энэ үнэн үү?
-Тийм зүйл байхгүй.  Ямар ч байсан үндсэн түрээлэгчид, давхар түрээслэгчид аль альныг нь хохироохгүй ажлын байртай болгож өгөх талаар л ярьж байгаа. Ярихын хэмжээнд явж байгаагаас яг гэрээ хийж тохирсон зүйл байхгүй. Гэхдээ бид ажлын байртай болсон цагт амьдралын баталгаатай болно гэдэг ойлгомжтой.

-Хохирлын хэмжээгээ өндөр хэлээд байгаа хүмүүс байгаа гэсэн. Энэ дээр ямар бодолтой байна?
-Бид бүгдээс цагдаагийн байгууллага хэдэн төгрөгний бараа материал байсан, хохирол хэд гарч байгааг асуусан. Харин хохирлын хэмжээгээ нэмж хэлж байгаа түрээслэгчид бол мэр сэр байгаа л байх. Гэвч бид тэднийг мэдэхгүй. Хуулийнхан өөрсдөө л тогтоох байх.

-Гал гарах үеэр нэг хүн нас барсан байгаа. Гэтэл тэр эмэгтэйн ар гэрт хэрхэн туслах зэргээр өдгөө хэн ч ярихгүй байгаа. Та нарын зүгээс хохирогчийн талаар хэр мэдэх вэ?

-Үйлчлэгч эмэгтэй байсан гэснээс өөр тодорхой мэдээлэл байхгүй.

-Хүнсний зах доторх цайны газруудаас галын шалтгаан үүдэлтэй гэж зарим хүмүүс ярьдаг. Та юу гэж боддог вэ?
-Хүнсний захад байнга хяналт шалгалт ирдэг байсан. Онцгой байдлын газраас хүртэл ирж хяналт шалгалтыг хийж, үзүүлэх сургалт зохион байгуулдаг байсан. Мэргэжлийн хяналтаас ч сургалт зөвөлгөөнийг тогтмол зохион байгуулж шалгалтыг цаг тухайд нь хийдэг байсан гэдгийг  л мэдэх юм байна. Агааржуулалтын тоног төхөөрөмж, утаа мэдрэх төхөөрөмж гэх мэт шаардлагатай бүр зүйлс тавигдсан байсан.  Мөн баллон, газ зэргийг ашиглахыг хориглосон учир цайны газруудад байхгүй байсан гэсэн.

-Буулгалтын ажил эхэлсэн гэсэн үү?
-Сар гаруйн хугацаатай цагдаагийн хамгаалалтанд байж байгаад хоёр гурван хоногийн өмнөөс буулгалтын ажил эхэлж байна. 12 дугаар сар гэхэд буулгаж дуусах юм гэсэн. Бид ажлын байраа л хурдан түргэн барихыг хүсч байна.

-Хүнсний захын түрээслэгчдээс сул зогсож байгаа хэчнээн хүн байгаа вэ?
-480-иад түрээслэгчдээс энд тэнд лангуу олж авах нь авцгааж хаа нэгтээ шингээд л зогсож байна. Яг ажлын байраар хохиросон 900-гаад хүн байна. Үүнд, тор зардаг, тэрэг түрдэг хүмүүс хүртэл багтана. Эд ч бас ажлын байр, амьдралын баталгаагүй болсон. Хүнсний зах шатсаныг нэг павьолон шатсан хэмжээнд ярих асуудал биш. Энэ бол хачирхалтай асуудал.