Ерөнхий сайдын ивээл дор Монголын залуучуудын холбооноос зохион байгуулдаг “Монгол Улсын иргэний андгай өргөх ёслол” өнөөдөр төрийн ордонд болж өнгөрлөө.

11 дэх жилдээ болж буй тус арга хэмжээнд 300 гаруй 16 настан оролцсон бөгөөд тэдний төлөөлөл болгож 42 тэргүүний залууст Ерөнхий сайд Н.Алтанхуяг, ХАХНХ-ын сайд С.Эрдэнэ МЗХ-ны ерөнхийлөгч Ж.Мөнхбат тэргүүтэй улс төр нийгэм, урлаг соёлын зүтгэлтнүүд МУ-ын иргэний үнэмлэхийг нь гардуулсан юм.  Энэхүү ёслолын гол зорилго нь МУ-ын иргэний үнэмлэх гардан авч буй шилдэг сурагчдаараа дамжуулан эх оронч үзэл, хөдөлмөрч зан суртахуун, хууль ёс заншлаа дээдлэх, түүх соёлоороо бахархах үзлийг залуучуудад төлөвшүүлэхэд оршдог аж.

Монгол Улсын Ерөнхий сайд Н.Алтанхуяг залууст хандаж хэлсэн үгэндээ “Өнөөдрөөс хүүхэд нас нь ард үлдэж, хамгийн их эрч хүчтэй, ихийг бүтээж цогцлоодог, хамгийн аз жаргалтай настайгаа золгож байна. Монгол Улсын иргэний эрх, үүргээ нэр төртэй авч яваарай. Монгол орноороо бахархаж, түүх соёлоо дээдэлж явах нь монгол залуу хүний эрхэм үүрэг. Өмнөө том зорилго тавьж түүндээ хүрэхийн төлөө зүтгэ. Нэрт эрдэмтэн Томас Эдисон гэрлийн чийдэн бүтээх гэж 267 удаа туршилт хийж байж амжилтад хүрсэн. Энэ бол тэвсэр хатуучилтай, зорилгодоо тууштай байхын үлгэр юм. Хичээл зүтгэлийг олж, хийж бүтээснээрээ бид дэлхийн залуучуудтай өрсөлдөх учиртай. Түүнээс биш хэн нэгнээс илүү гарах гэж Чингисийн үр сад гэж цээжээ дэлдээд амжилт олохгүй. Алдаа дутагдалгүй хүн гэж байхгүй. Бүх хүн нэг хийцийнх. Зорилго тавьж зүтгэдэг, тэмцдэг, тэсвэрлэдэг чанар хүн хүнд өөр байдаг, үүгээрээ л ялгаатай. Тиймээс энэ чанаруудыг өөртөө бий болгож, зорилгынхоо төлөө зүтгэх нь залуучууд та бүхний амжилтын эхлэл болно” гэлээ.
Харин залуучууд Монгол улсын иргэний андгай өргөхдөө:
“Төрт ёс, язгуур соёл, баатарлаг түүхтэй, тусгаар тогтносон Монгол Улсын эрх чөлөөт иргэн-Би
Мөнх хөх тэнгэрийн дор, мөнхөд дэгжих эх орныхоо төлөө
Эв нэгдэл, эрх чөлөөг дээдлэн,
Өвөг дээдсийн өндөр цадигтай,
Өнөд мандах Монголынхоо төлөө
Хүмүүнлэг иргэний ардчилсан нийгэм
Хөгжил дүүрэн шударга амьдралын төлөө
Эрдэм боловсролтой, энэрэнгүй журамт иргэн байж
Дэлхийн энгээр, Монгол нэрийг сайнаар бадраасан иргэн байхаа
Ард түмэндээ андгайлж байна гэв.

24tsag.mn