Дөнгөж сая “Өгөх өдөр хөдөлгөөн” ТББ-аас жил бүрийн арваннэгдүгээр сарын 1-нд уламжлал болгон зохион байгуулдаг “Үндэсний өгөх өдөр”-ийн хүрээнд хийх ажлуудынхаа талаар мэдээлэл хийлээ. Тэд өнгөрсөн жилийн өгөх өдрөөр АНУ-ын нэрт зохиолч Шел Силверстайны “Өглөгч Мод” номыг нийслэл болон хөдөө орон нутгийн сургуулиудад үнэгүй тараасан бөгөөд тэр номыг уншаад төрсөн сэтгэгдлээ өөрийнхөөрөө тайлбарлах зургаар илэрхийлэх зохион бичлэг болон гар зургийн уралдааныг зарлажээ. Энэхүү уралдааныг БОНХЯ, “Өгөх өдөр хөдөлгөөн” ТББ, “Дэлхийн зөн – Монгол” олон улсын байгууллага хамтран зохион байгуулж байгаа юм. Уралдааны гол зорилго бол Ерөнхий боловсролын бага, дунд, ахлах ангийн сурагчдад эх дэлхийгээ хайрлан хамгаалах, хүрээлэн буй байгаль орчинтойгоо зөв харьцах, хайртай хүмүүсээ дээдлэн хүндлэх үзлийг төлөвшүүлэхэд чиглэж байгаа аж.
Уралдаанд ирүүлэх материалыг энэ сарын 24 хүртэл хүлээн авах ба ялагчдад ирэх сарын 1 буюу "Үндэсний өгөх өдөр" шагнал гардуулах юм байна.
Мөн энэ өдөрт нэгдсэн Хамтын халуун сэтгэл нэгдлээс Батсүмбэрийн асрамжын газрын бүх ахмадуудад ор хөнжлийн даавуу дэрний уутыг иж бүрнээр нь солих аяныг Facebook цахим хуудсаар өрнүүлжээ.
Түүнчлэн энэ оны хоёрдугаар сард Дорноговь аймгийн Ихэд суманд гэртэйгээ шатаж түлэгдсэн Э.Алтангэрэл хүүд туслах хандивын аяныг "Үндэсний өгөх өдөр"-ийг тохиолдуулан дахин явуулахаар болжээ. Учир нь түүнийг Солонгос руу эмчилгээнд явуулахад хөрөнгө мөнгө дутаад байгаа юм. Өнгөрсөн хугацаанд түүний эмчилгээнд зориулж хандивын тоглолт хийсэн боловч эмчилгээний зардал 15 сая төгрөгнөөс дөрөв орчим сая төгрөгийг нь олж чаджээ. Ингээд түүнд тусалж буй Оюунлаг нийгмийн залуус ТББ-ын залуус Үндэсний өгөх өдөрт нэгдэн түүнд дахин хандив цуглуулж байгаа нь энэ аж.
