Дорноговь аймгийн Улаанбадрах суманд ураны хайгуул хийдэг Францын “Aрева” группийн охин компани болох "Кожегоби"-ийн үйл ажиллагааг түр хугацаагаар зогсоогоод байсан ч тус компани дахин олборлолтоо хийж эхэлжээ.

Уг нь Улаанбадрах сумын малчид, Гал үндэстэн холбооныхон нийлж цөмийн эсрэг тэмцлийг өрнүүлж,  дөрвөн машин, 10 мотоцикль болон тэмээгээ унаж очин тус компанийн өрөмдлөг хийж буй цэгийг бүслэн хаасан юм. Тиймээс "Кожегоби" компанийхан өрөмдлөгөө түр зогсоож өрөмдлөгийн техникээ буулгаж, кемпээ татаад байсан билээ.

"Кожегоби" компанийн зүгээс малчидтай тохиролцож үйл ажиллагаагаа үргэлжлүүлэн явуулна гэж байсан ч малчид нутагтаа ураны хайгуул хийлгэхгүй гэж зүтгэсээр байгаа юм. Тэгвэл тус компанийнхан ойрноос үйл ажиллагаагаа бүр идэвхжүүлж эхэлсэн гэнэ. Тэд “Зөөвч овоо” хэмээх ордныхоо ойролцоо уран хайх, олборлох зориулалттай зургаан өрөм зоосон байна.

Өмнө нь тус компани ураны хайгуул хийснээс болж Улаанбадрах сумын 300 гаруй өрхийн мал үхэж, гажигтай төл гарч байсан. Гэвч Ерөнхий сайд Н.Алтанхуягийн томилсон мэргэжлийн багийнхан тугал хорогдсон шалтгаан уранаас биш селени гэх бодисоос үүдэлтэй гэсэн дүгнэлт гаргасан юм.  “Арева” компани 2008 онд Швейцарийн байгаль орчныг хамгаалах олон нийтийн “Greenpeace swiss” байгууллагаас “Тhe Public Eye” буюу олон нийтийн нүд гэх “шагнал”-ыг хүртэж байжээ. Энэ шагналыг байгаль орчныг сүйтгэдэг хамгийн ичгүүргүй байгууллагад олгодог байна.