Хүний наймааны золиосонд охиноо алдсан Ц.Ганзориг өнгөрсөн аравдугаар сард нас барсан билээ. Тэрээр охиноо хүний наймааны золиосонд алдсан тул “Хүний наймааг зогсооё” хэмээн өлсгөлөн зарлаж байсан юм. Гэвч охиныг нь хохироож, хүчээр биеийг нь үнэлүүлж байсан хүмүүст хуулийнхан одоо хүртэл арга хэмжээ авч, хариуцлага тооцоогүй байгаа билээ. Харин талийгаач Ц.Ганзоригийн эхнэр,хүү, найман сартай жирэмсэн охин гурвыг саатуулж, цагдан хорьсон талаарх мэдээлэл гарсан билээ. Тэд гэр бүлээрээ танхайн сэдэлтэй хэрэгт холбогдсон талаар албаныхан хэлж байсан. Тэгвэл Ц.Ганзоригийн эхнэр хоригдсоноосоо хойш бие нь муудсан аж. Тиймээс Ц.Ганзориг агсны гэргийг "Лантуун дохио" ТББ-н зүгээс эмнэлэгт хэвтүүлэн эрчимтэй эмчилгээ хийлгэж байгаа аж.