Сүүлийн жилүүдэд бөөрний үрэвсэл,  архаг өвчин эрс нэмэгдсэнтэй холбоотойгоор “Зонхилон тохиолдох бөөрний эмгэгийн асуудлууд” сэдвээр сургалт семинарыг ЭМЯ-нд  зохион байгуулсан билээ.

Монгол Улсын хүн амын гуравны нэг хувь нь бөөрний өвчтэй, бөөрний өвчлөл залуужиж нас баралтын гурав дахь шалтгаан болж байгаа нь эмч мэргэжилтнүүдийн сэтгэл зовоосон асуудал болж байгааг эмч нар энэ үеэр онцолж байв. ЭМЯ-ны статистик судалгаагаар сүүлийн гурван жилд нийт халдварын бус гаралтай өвчлөлийн эхний гуравт бөөрний эмгэг оржээ. Ид хөдөлмөрлөх буюу 18-40 насныхны дунд бөөрний архаг үрэвсэл нэлээд нэмэгдэж байгаа аж. Улсын клиникийн төв эмнэлгийн Бөөр судлалын эрхлэгч, Монголын бөөрний эмч нарын нийгэмлэгийн тэргүүн, клиникийн профессор Б.Бямбадаш , “Бөөр хамгаалах дэлхийн өдрөөр сургуулийн хүүхдүүдийг урьдчилан сэргийлэх  үзлэгт хамруулахад 60-70 хувь нь шүдний хорхой, хоолойны ангинтай байсан. Ийм хэлбэрээр биед байгаа идээт голомт биеийн эсэргүүцэл сулрахад бөөр, зүрхийг үрэвслүүлж, хүндрэл өгдөг. Мөн төрөл бүрийн хоол хүнс, ажлын нөхцөл, хэрэглээ, агаарын бохирдолтой холбоотойгоор төрөлхийн гаж хөгжилтэй, биеийн эсэргүүцэл сул дорой, амьдрах чадвар муутай хүүхдүүд төрж байгаа нь бөөрний өвчлөл нэмэгдэхэд нөлөөлж байна. Бөөрөө хамгаалахын тулд ажлын ачааллаа зөв зохицуулж, доороосоо даарахгүй байх хэрэгтэй. Мөн өвдсөн тохиолдолд эртхэн оношлуулж эмчлүүлэх шаардлагатай” гэв.