Манай улсын иргэд сүүлийн үед ОХУ, Казахстан, Беларусь зэрэг улсад зорчихдоо Монгол Улсад бүртгэлтэй хувийн тээврийн хэрэгсэлтэй ихээр нэвтэрч байгаатай холбогдуулан Монгол Улсын Гаалийн ерөнхий газарт ОХУ-ын Буриад Улсын Гаалийн газар 2013 оны 10 дугаар сарын 03-ны өдрийн 09-34/11192 дугаар албан бичгээр Гаалийн холбооны гишүүн орнууд болох ОХУ, Казахстан, Беларусь улсын хилээр түр хугацаагаар тээврийн хэрэгслийг нэвтрүүлэх үед мөрдөх гаалийн дүрэм, журмын талаарх холбогдох мэдээллийг ирүүлсэн байна.    

    Гаалийн холбооны гишүүн орнуудын нутаг дэвсгэрт хувийн тээврийн хэрэгслийг түр хугацаагаар нэвтрүүлэх тухай журмаас

 1. Гаалийн холбооны гишүүн орнуудын гаалийн нутаг дэвсгэрт түр хугацаагаар өөр улсын бүртгэлтэй тээврийн хэрэгслийг нэвтрүүлж болно.

2. Эдгээр тээврийн хэрэгслийг нэвтэрч буй улсын гаалийн байгууллагад мэдүүлэх шаардлагатай. Түр нэвтрүүлэх нөхцөл нь тээврийн хэрэгслийг нэвтрүүлж байгаа иргэн, хувь хүний зэрэглэлээс шалтгаална.

3. Гаалийн холбооны гишүүн орнуудад байнга оршин суудаг хувь хүн тээврийн хэрэгслээ гаалийн холбооны нутаг дэвсгэрт чөлөөт эргэлтэд оруулах тохиолдолд гаалийн болон бусад татварыг төлөх баталгаа гаргах нөхцөлтэйгээр 6 сар хүртэл хугацаанд тээврийн хэрэгслийг түр нэвтрүүлэх эрхтэй.

4. Гадаадын иргэн өөрийн хувийн тээврийн хэрэгслийг гаалийн болон бусад татвар төлөхгүйгээр мөн гаалийн болон бусад татварыг төлөх баталгаа гаргахгүйгээр 1 жил хүртэл хугацаагаар гаалийн холбооны гишүүн орнуудын нутаг дэвсгэрт түр нэвтрүүлэх эрхтэй.

5. Холбооны гаалийн байгууллага тээврийн хэрэгслийн түр нэвтрүүлэх хугацааг эхний удаад 3 сараар тогтооно. Уг хугацааг сунгах шаардлагатай тохиолдолд гаалийн байгууллагын тогтоосон хугацаа дуусахаас өмнө эрх бүхий гаалийн байгууллагад зөвшөөрөгдөх хугацаагаар сунгуулах хүсэлтийн хамт хандаж болно.

6. Түр хугацаагаар нэвтрүүлэх тээврийн хэрэгслийг бусдад шилжүүлэх бол зөвхөн гаалийн мэдүүлэг бичиж, гаалийн болон бусад татварыг төлнө.

7. Харин мэдүүлэгч нас барсан, хүнд өвчтэй эсхүл бусад шалтгаантай тохиолдолд гаалийн байгууллагын зөвшөөрөлтэйгээр бусдад тээврийн хэрэгслийг шилжүүлж, гаалийн нутаг дэвсгэрээс гарч болно.