“Хүн амын дундах түлэгдэлтээс урьдчилан сэргийлэх мэдлэг, чадварыг нэмэгдүүлэх нь” сэдэвт уулзалтыг өнөөдөр сэтгүүлчдийн дунд зохион байгууллаа.
           
Ялангуяа 0-5 насны хүүхдийн осол гэмтлийн тэргүүлэх шалтгааны нэг нь түлэгдэлт өвчин болоод байгаа гэдгийг эмч нар анхааруулж байна. Тодруулбал, зөвхөн 2012 онд л гэхэд Гэмтлийн эмнэлэгт түлэгдэлтээр хандсан 1241 өвчтөнөөс 851 тохиолдол нь (69%)  буюу талаас илүү хувь нь зөвхөн 0-4 насны хүүхдүүд байсан байа.

 Улаанбаатар хотод 0-5 хүртэлх насны хүүхдийн түлэгдэлтийн өвчлөл, нас баралт болон тахир дутуу бологсдын тоо жилээс жилд өсөн нэмэгдэж байгаа аж. Тиймээс түлэгдэлтээс урьдчилан сэргийлэх асуудалд зөвхөн эрүүл мэндийн байгууллагууд бус төрийн болоод хувийн хэвшлийн байгууллагуудын хамтын ажиллагаа оролцоо нэн чухал байна гэдгийг эмч нар ярьж байна.

Иймд түлэгдэлтэнд өртөж буй өндөр эрсдэлтэй бүлэг болох 0-5 хүртэлх насны хүүхдийн түлэгдэлтийг бууруулахын тулд эцэг эхчүүд, асран хамгаалагчдын анхаарал болгоомжлолыг нэн тэргүүнд нэмэгдүүлэх шаардлагатай байгаа гэв.
          
 0-5 хүртэлх насны хүүхдэд тохиолдож байгаа нийт осол гэмтлийн нэгдүгээрт халуун ба химийн үйлчлэлээр түлэгдсэний улмаас эмнэлэгт хандсан тохиолдол тэргүүлж байна.

Энэ өвчнөөс урьдчилан сэргийлэх болон анхны тусламжийг зөв зохистой үзүүлэх мэдлэг, чадварыг сайжруулах хэрэгцээтэй байгаа юм байна.

Ер нь түлэгдэлтийн шалтгааныг авч үзвэл халуун хоол цайнд түлэгдсэн тохиолдол нийт шалтгааны 47-52.2 хувийг эзлэж байгаа бөгөөд бага насны хүүхэд аюултай нөхцлийг бүрэн гүйцэд ухамсарлах чадвар хязгаарлагдмал, эсрэг хариу урвалыг гүйцэд хурдан үзүүлж чаддаггүйгээс аливаа аюулд илүүтэй өртөж үүний улмаас нас барах, тахир дутуу болох, өвчлөх тоо жилээс жилд нэмэгдэж байгаа талаар дэлхийн эрүүл мэндийн байгууллагаас мэдээлсэн байна.