Дуу, дүрс бичлэгийн өвийг хадгалан хамгаалах зайлшгүй шаардлага байгааг үндэслэн жил бүрийн 10 дугаар сарын 27-ны өдрийг “Дуу, дүрс бичлэгийн өвийг хамгаалах дэлхийн өдөр” болгон тэмдэглэхийг 2005 онд ЮНЕСКО-гоос дэлхий нийтэд уриалсан. Эл өдрөөр ЮНЕСКО-гийн Ерөнхий захирал Ирина Бокова гишүүн орнууддаа хандан илгээлт хүргүүлдэг бөгөөд энэ жил дэлхий даяар “ХОЙЧ ҮЕДЭЭ ӨВӨӨ ҮЛДЭЭЦГЭЭЕ” уриан дор тэмдэглэн өнгөрүүлэх гэж байна.Дуу, дүрс бичлэгийн өвийг хамгаалах дэлхийн өдрийг тэмдэглэн өнгөрүүлэх хүрээнд энэ жил ЮНЕСКО-гийн Монголын үндэсний комисс, Архивын ерөнхий газрын Кино, гэрэл зураг, дуу авианы баримтын төвтэй хамтран “ХОЙЧ ҮЕДЭЭ ӨВӨӨ ҮЛДЭЭЦГЭЭЕ” сэдэвт өдөрлөгийг кино уран бүтээлчид, архивчид болон түүх соёл, сэтгүүл зүйн чиглэлээр суралцдаг оюутан залуусыг хамруулан өнөөдөр 10:00 цагт тус төвийн байранд зохион байгуулах гэж байна.
Тус үйл ажиллагааг нээж ЮНЕСКО-гийн Монголын үндэсний комиссын Ерөнхий нарийн бичгийн дарга Г.Жаргалсайхан, Архивын ерөнхий газрын дарга И.Саруул болон Кино, гэрэл зураг, дуу авианы баримтын төвийн эрхлэгч П.Даваасүрэн нар үг хэлнэ. Өдөрлөгт ЮНЕСКО-гийн Бээжин дэх төлөөлөгчийн газрын Мэдээлэл, харилцаа холбооны зөвлөх Андреа Кайрола, Архивын ерөнхий газрын дарга нарын зөвлөлийн төлөөлөл болон их дээд сургуулиудын түүх, сэтгүүл зүйн ангийн оюутнууд оролцох бөгөөд үйл ажиллагаа 2 цаг үргэлжилнэ.
Урлагийн гавьяат зүтгэлтэн, Баримтат киноны найруулагч Ж.Норолхоо, найруулагч Д.Цэнддорж нар энэхүү өдөрлөгт оролцож оюутнуудтай нээлттэй ярилцлага өрнүүлэх бөгөөд Ж.Норолхоогийн найруулсан, 1999 онд бүтээгдсэн “Санжаасүрэнгийн Зориг” 3 бүлэг баримтат кино болон 1938 онд бүтээгдсэн манай улсын анхны баримтат /дуугүй/ кино болох “Эдүгээ Монгол” зэрэг киног өдөрлөгт оролцогчдод үзүүлж сонирхуулахаас гадна дуу, дүрс бичлэгийн өвийн ач холбогдлыг илтгэх түүхэн баримтуудын үзэсгэлэн гарна.
Уг өдөрлөгийн зорилго нь дуу, дүрс бичлэгийн өвийн талаарх олон нийтийн мэдлэг ойлголтыг дээшлүүлэх, баримтат өвийн асуудалд хэвлэл мэдээллийн хэрэгслийн анхаарлыг чиглүүлэх, архивын баримтын ач холбогдлыг дээшлүүлэх, энэ чиглэлээр суралцдаг оюутан залуусын оролцоог нэмэгдүүлэх, эл өдрийг орон нутгийн болон улсын цаашлаад олон улсын түвшинд тэмдэглэх арга замыг олж судлах болон элэгдэж гэмтсэн ховор баримтат өвүүдийг сэргээн засварлах талын арга замыг эрэлхийлэхэд оршиж байна.
ҮТА-ын Кино, гэрэл зураг, дуу авианы баримтын төвд одоогоор манай улсын төдийгүй хүн төрөлхтний түүхийн ховор нандин баримт болох 212 нэрийн уран сайхны кино, 1009 нэрийн баримтат кино, 1000 гаруй кино мэдээ, 60000 гаруй гэрэл зураг, пянз, соронзон хальс зэрэг 14 нэрийн 2886 хадгаламжийн нэгж дуу авианы баримт хадгалагдаж байна. Хэдийгээр хүмүүст туршлага, бүтээлч байдал, мэдлэгээ бусадтай хуваалцах өргөн боломжийг олгодог дуу болон дүрс бичлэгийн шинэ шинэ технологиуд хэрэглэгч бидний хүртээл болсоор байгаа ч хэдийн бий болсон дээрх түүхийн үнэт өв болсон баримтуудыг бүрэн бүтнээр хадгалан хамгаалж ирээдүй хойч үедээ бүрэн бүтнээр нь өвлүүлэн үлдээх зайлшгүй шаардлага зүй ёсоор тулгарч байна.Иймд энэ үйл ажиллагаа эл өдрийн ач холбогдлыг өргөж, олон нийтийн мэдлэг ойлголтыг дээшлүүлэхэд тодорхой хувь нэмрээ оруулна гэж зохион байгуулагчид үзэж байна.
