Өнөөдөр нийслэл Улаанбаатар хотын өдөр тохиож байна. Энэ өдрийг тохиолдуудан Нийслэлийн Засаг дарга иргэддээ бэлэг барих үүднээс хямдралтай худалдаа зохион байгуулахыг  аж ахуйн нэгжүүдэд уриалсан. Үүний дагуу өнөөдөр 30 гаруй аж ахуйн нэгж нэгдэн “Урамтай урамшуулал, хэмнэлттэй  хямдрал” худалдааг зохион байгуулах гэж байна.

Хямдралтай худалдаа өнөөдөр Хан-Уул дүүргийн Яармаг худалдааны төв, Сүхбаатар дүүрэг-15-р хорооны талбай, Сонгинохайрхан дүүрэг- Ханын материал, Дүүхээ төвийн талбай, Баянгол дүүрэг-Энэбишийн гудамж, Чингэлтэй дүүрэг- “Нарантуул-2” худалдааны төв талбай, Баянзүрх дүүрэг-Жуковын талбай болон Чингисийн талбайд болох юм.

Тухайлбал Их эзэн Чингисийн талбайд“Номин тав трейд” ХХК бараандаа 30 хувь, “ВSВ сервис” ХХК цахилгаан бараа, компьютерын худалдааг 2-3 хувийн хямдралтай үнээр худалдах аж. Мөн энэ үеэр “Дархан нэхий” компани нэг хүнийг  “Нийслэлийн азтан”-аар шалгаруулж, гадна  зам талбайн үйлчлэгч нарт ажлын бээлий олгох юм. Түүнчлэн үсчин гоо сайханчдын холбоо үс  арчилгаа, үс уналтын оношлогоо хийх , нэр бүхий салоноор 15-25 хувийн хямдралтай үйлчлүүлэх боломжийг иргэдэд олгоно. Аж ахуйн нэгжүүд зөвхөн хямдралтай худалдаа явуулаад зогсохгүй урамшуулалтай үйлчилгээг явуулах юм. “Номин тав” трейд ХХК Номин стандарт агуулахаар барилгын материалын агуулах чөлөөлөх худалдааг зохион байгуулж, 50 мянган төгрөгийн худалдан авалт тутамд сугалаа сугалж, 374 азтанг тодруулна. Мөн “Алтан жолоо трейд” ХХК хөнгөлөлтийн картын аян, “Хатан сүлжээ” ХХК худалдааны 11 салбарт бүх бараанд 5-20% хямдрал  зарлах аж.