Гэмтэл, согог судлалын үндэсний төвийн эмч ажилчид өнгөрсөн наймдугаар сард шинээр томилогдсон дарга Ц.Энхбаярын томилгоог хууль бус гэж үзэн түүнийг огцруулахыг шаардаад багагүй хугацаа өнгөрсөн.

Эмч ажилчид Ц.Энхбаярыг сонгон шалгаруулалт хийлгүй шууд томилсон, мөн тэрээр ажиллах хугацаандаа хууль бус халаа сэлгээ хийсэн хэмээн үзэж байгаа юм.

Тэдний эсэргүүцлийн арга хэмжээ өнгөрөгч сараас эхэлсэн бөгөөд жагсаал цуглаан зохион байгуулж, 180 гаруй эмч ажилчид халагдах өргөдөлөө өгөөд байсан юм. Тэгвэл өчигдөр тус төвд үүссэн асуудлаар өдөржин хуралдсан Эрүүл мэндийн сайдын зөвлөлийн хурлын шийдвэрээр Ц.Энхбаяр даргатай хийсэн хөдөлмөрийн гэрээг цуцлах шийдвэрийг гаргалаа.

Биднийг очиход тавь гаруй эмч ажилчид зөвлөл хуралдаж буй өрөөний үүдэнд жагсаж байсан бөгөөд Эрүүл мэндийн сайд Н.Удвал тэргүүтэй зөвлөлийн гишүүд жагсагчдын төлөөлтэй уулзан эмч ажилчдын байр суурийг сонсож байсан юм.

Н.Бүргэд эмч зөвлөлийн өрөөнөөс гарч ирээд “Сайдын зөвлөлөөс эмч ажилчдын дунд санал нууц санал хураалт явуулахаар боллоо. Дэмжиж байгаа нь дэмжиж байгаагаа харин дэмжихгүй байгаа нь дэмжихгүй гэдгээ бичиж хайрцагт хийнэ” гэв. Улмаар 300 орчим эмч ажилчдыг ГССҮТ-ийн хурлын танхимд цуглуулсан юм. Зөвлөлийн гишүүд орж ирснээр санал хураалт эхлэх байсан ч тэд цаг гаруй болоход орж ирээгүй. Хүлээж залхсан эмч ажилчид зөвлөлийн өрөөний гадаа дахин жагсаж эхэлсэн. Энэ үед Н.Удвал сайдын хуулийн зөвлөх сайдад бүрэн эрхийнхээ дагуу өөрөө шийдвэр гаргахыг зөвлөснөөр санал хураалт болоогүй юм.

Эцэст нь зөвлөлийн гишүүдтэй дахин уулзсан эмч ажилчдын төлөөл Ц.Энхбаярын томилгоог цуцлах шийдвэр гаргасныг зарласан. Бид сайдын зөвлөл ямар учраас ийм шийдвэрийг гаргах болсныг ЭМ-ийн сайд Н.Удвалаас тодрууллаа.  

Н.Удвал:Ц.Энхбаяр даргад баярласнаа илэрхийлэх нь зүйтэй

-Ц.Энхбаярын томилгоог цуцлах шийдвэр гаргасан нь энэ томилгоог хууль бус байсныг хүлээн зөвшөөрч байна гэж ойлгож болох уу?
-Хууль ёсны бус байсан гэж үзэхгүй. Бас эмч ажилчдын зөв ч гэж үзэхгүй байгаа. Энэ нөхцөл байдлын үр дагавар иргэдийн эрүүл мэнд амь насанд эрсдэлтэй байгаа учраас тэр байдлыг үндэслэж энэ хүнийг ажлаас чөлөөлөх нь зүйтэй гэж үзэж байгаа юм. Нэгэнт энэ хоёр тал зохицож нэгэн баг болох процесс өнгөрсөн нэг сарын хугацаанд амжилттай  болж чадахгүй байгаа учраас үүнийг нэн даруй засах нь зүйтэй. Түүнээс биш томилгоог хуулийн дагуу болгож байгаа гэж ойлгож болохгүй.

-Цаашдаа ямар тус эмнэлэгийн үйл ажиллагаа хэвийн явагдах уу?
-ГССҮТ-ын захирал Ц.Энхбаяр дараагийн захирал томилогдтол түр үүрэг гүйцэтгэгчээр ажиллах болно. Энэ нь тодорхой хуулийн хүрээнд хугацаа шаардах байх. Харин тус эмнэлэгийн эмч ажилчдыг ёс зүйн өндөр хариуцлагатай ажлын байран дээрээ аливаа эмх замбараагүй байдал үүсгэхгүй, ажил хаяхгүй байхыг анхааруулсан. Эмч ажилчид эмчилгээ үйлчилгээгээ хэвийн явуулна. Түрүүний найман хүнээс өөр нэмж халагдсан хүмүүс байхгүй. Эмч ажилчдын төлөөлөл ГССҮТ-ийн үйл ажиллагаа хэвийн явагдана, хүний амь нас эрсдэх аюул гарахгүй хэмээн амлалт өгсөн. Түүнчлэн дараагийн захирал томилогдох хүртэл ЭМЯ-наас дэмжин туслах багийг ГССҮТ-д ажиллуулах гэж байна. Тэр баг удирдлага болон эмч ажилчдын хооронд үл ойлголцол үүсэх, хууль бус зүйл гарахаас сэргийлэх үүрэгтэй байх юм. Би энэ завшааныг ашиглаад Ц.Энхбаяр даргад баярласнаа илэрхийлэх зүйтэй гэж бодож байна. Яагаад гэвэл Ц.Энхбаяр дарга өөрийнхөө мэдлэг чадвар юм уу, аль эсвэл ямар нэгэн байдлаар ажилаа хийж чадахгүй  байдалд ороогүй. Харин иргэдийн амь нас эрүүл мэнд аль ч албан тушаалтны эрх ашгаас илүү юм гэдгийг ойлгосон. Үүнд Энхбаяр дарга болон эмч ажилчид, сайдын зөвлөл ч тэр ч нэгдсэн учраас бид ийм хамтын шийдвэрийг гаргалаа.

-Энэ хугацаанд гарсан иргэдийн хохиролыг яах вэ?
-Иргэдэд тохиолдсон хохирол байхгүй. Хоёр тохиолдлыг ярьж байгаа. Тэрийг мэргэжлийн баг яг үнэн зөв эсэхийг тодорхойлно. Хэвлэлээр хоёр өөр зүйл мэдээлсэн. Яг аль нь үнэн зөв юм бэ гэдгийг мэргэжлийн баг  ЭМЯ-аас томилогдон ард иргэдэд хэвлэл мэдээллийн хэрэгслээр дамжуулан бодитой мэдээлэлийг өгнө. Түүнээс биш сенсаацлаад янз бүрийн юм ярьж улс төржүүлэх хэрэг байхгүй. Бодитой мэдээллийг мэргэжлийн хүмүүс өгнө. Сайд өгөхгүй.

-Дараагийн даргын томилгоо хэзээ байх вэ?
-Аливаа томилгоог хийхдээ АТГ-аас бичиг авч байж хийгддэг. Тухайн албан тушаалд энэ хүн ажиллахад ашиг сонирхлын зөрчил байна уу гэдгийг судалж тэр бичиг нь ирсний дараа томилгоо хийгддэг учиртай. Тийм учраас тэр бичгийг аваад ямар хүн байна гэдгийг судалдаг юм билээ. Энэ ажил 10-14 хоногийн дотор шийдэгддэг. Тиймээс дараагийн даргыг томилоход тодорхой хугацаа байна. Үүнийг яг тэд гэж хэлж чадахгүй. Ямар ч байсан хуулийн хугацаанд нь томилно.

-Одоо ажилаасаа халагдчихсан байгаа эмч нарын асуудал яаж шийдэгдэх вэ?
-Энэ бол дараагийн дарга шийдэх асуудал. Ажлаас халагдсан найман эмч өөрсдийн хүсэлтээр өргөдөлөө өгөөд ажилаас халагдсан байгаа. Тэд хүсэлт тавиад ажилдаа орох эрх нь нээлттэй.