Шүүхийн тухай багц хууль хүчин төгөлдөр болсонтой холбогдуулан ЭБШХ,ИХШХШТХ,ЗХХШТХ-д нэмэлт өөрчлөлт оруулах талаар Улсын Дээд шүүхээс өнгөрсөн баасан гарагт мэдээлэл хийв.Хэвлэлийн бага хуралд Улсын Дээд шүүхийн Эрүүгийн хэргийн танхимын тэргүүн, Монгол Улсын гавъяат хуульч С.Нямжав Эрүүгийн байцаан шийтгэх хуульд оруулах, Иргэний хэргийн танхимын тэргүүн Б.Ундрах Иргэний хэрэг хянан шийдвэрлэх тухай хуульд оруулах , Захиргааны хэргийн танхимын тэргүүн О.Зандраа Захиргааны хэрэг хянан шийдвэрлэх хуульд оруулах нэмэлт,өөрчлөлтийн төсөлийг тус тус танилцуулав.
Мөн Тамгын газрын даргын албан үүргийг түр орлон гүйцэтгэгч Ж.Наранпүрэв “Монгол Улсын шүүхүүдийн 2008-2012 оны шүүн таслах ажлын тойм мэдээ, Улсын Дээд шүүхэд гарч буй өөрчлөлт, Улсын Дээд шүүхийн Ерөнхий шүүгчийн албан захидлын тухай” сэдвүүдээр мэдээлэл хийлээ.
УИХ-ын чуулганы нэгдсэн хуралдаанаар 2013 оны 10 дугаар сарын 31-ний өдөр Иргэний хэрэг шүүхэд хянан шийдвэрлэх тухай хуульд нэмэлт, өөрчлөлт оруулах тухай, Эрүүгийн байцаан шийтгэх хуульд нэмэлт, өөрчлөлт оруулах тухай, Монгол Улсын Шүүхийн тухай хуульд өөрчлөлт оруулах тухай, Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслүүдийн хэлэлцэх эсэх тухай асуудлыг хэлэлцээд анхны хэлэлцүүлэгт бэлтгүүлэхээр буцаагаад байгаа юм.
УИХ-аас 2012 оны 3 дугаар сарын 7-ны өдөр Шүүхийн тухай, Шүүгчийн эрх зүйн байдлын тухай, Шүүхийн захиргааны тухай, Эвлэрүүлэн зуучлалын тухай болон Шүүхийн иргэдийн төлөөлөгчийн эрх зүйн байдлын тухай хуулийг баталсан. Үүний дагуу Шүүхийн багц хуулийн хүрээнд гарч буй зарчмын шинжтэй томоохон өөрчлөлтүүдийг шүүх болон хууль хэрэглэх практикт бодитойгоор хэрэгжүүлэх, хууль тогтоомжийн уялдаа холбоог хангах үүднээс дээр нэр дурдсан хянан шийдвэрлэх хуулиудад нэмэлт, өөрчлөлт оруулах шаардлага гарч байгаа аж.
