Энэ баасан гаригт багш, эмч нар Чингисийн талбайд жагсаал хийхээр болжээ. Энэ тухайгаа тэд өнөөдөр хэвлэлийнхэнд дуулгалаа.

УИХ-ын чуулганаар 2014 оны төсөв хэлэлцэж байгаатай холбогдуулан МҮЭ-ийн холбооноос ирэх онд цалин, тэтгэвэр тэтгэмжийг нэмэгдүүлэх асуудлаар хэд хэдэн удаа Засгийн газарт шаардлага хүргүүлсэн. Гэтэл Засгийн газраас ямар нэгэн дорвитой арга хэмжээ авахгүй байгаад эмч, багш нар ихээхэн шүүмжлэлтэй хандаж байна.

МҮЭХ-ны зүгээс цалин, тэтгэвэр, тэтгэмжийг 40 хувиар нэмэх шаардлагатай гэсэн байр суурьтай байгаа. Харин Засгийн газрын зүгээс цалин, тэтгэвэр, тэтгэмжийг нэмэгдүүлэхэд 200 тэрбум төгрөгийг улсын төсвийн төсөлд сууулгаж байгаа юм.

Харин үүнийг МҮЭХ-ынхон дургүйцэн хүлээн авч байгаа. Энэ талаар МҮЭХ-ны ерөнхийлөгч Х.Амгаланбаатар ярихдаа “Ирэх жилийнхээ төслийн төсвийг батлахын өмнө ингэж цалин хөлс, тэтгэвэр тэтгэмжийг нэмэгдүүлэх талаар ярьж байгаа нь дэвшил гэж үзэж байна. Гэхдээ шууд л 200 тэрбум төгрөгөөр нэмэгдүүлнэ гэж заах нь учир дутагдалтай. Учир нь энэ мөнгө нь илүү задаргаатай байх ёстой. Нийтэд нь бодоод үзэхээр цалин хөлс, тэтгэвэр тэтгэмж ердөө л найман хувиар нэмэгдэх тооцоо гарч байна. Өнөөгийн нөхцөлд энэ нь хангалттай нэмэгдэл болж чадахгүй. Тиймээс бид нийгмийн зөвшилцлийн гурван талт хэлэлцээр дээр энэ асуудлыг дахин төвих болно” гэсэн юм. Мөн сүүлийн гурван жилийн инфляцийн түвшинтэй уялдуулж цалинг нэмэх шаардлагатай гэж байгаа юм.

Үндэсний статистикийн хорооны мэдээллээр 2012 онд жилийн эцсийн инфляцийн түвшин 14 хувь, 2013 оны 9 дүгээр сарын байдлаар 8.2 хувь буюу нийт инфляцийн түвшин 23.3 хувьтай байна. Мөн эдийн засгийн өсөлт 2012 онд 12.3 хувь, 2013 оны эхний хагас жилд 11.3, нийт 23,6 хувийн өсөлттэй байгаа учир цалин тэтгэврийг 46,5 хувиар нэмэгдүүлэх нь бодитой үндэслэл гэж МҮЭХ-оос үзэж байгаа.

Удаа дараагийн шаардлагыг нь хүлээж авахгүй байгаа учир багш, эмч нар цалингаа нэмүүлэхийн тулд дуу хоолойгоо нэгтгэж бүгд жагсаалд идэвхтэй оролцоно гэлээ.

Багш, эмч нарын ажлын нөхцөл хүнд, ачаалал ихтэй байдаг атал цалин маш бага байдаг. Тийм учраас эмч нар цалингаа 1-1.2 сая төгрөг, багш нар 600 мянга буюу түүнээс дээш болгохыг хүсч байгаа аж.

Тодруубал цэцэрлэгийн багш нар гэхэд бүтэн 10 цагийн турш 40-50 хүүхэдтэй ажиллаж байж дөнгөж 300 мянган төгрөгийн цалин авдаг гэнэ. Авсан цалин нь амьдралд нь хүрэлцэхгүй байнгын зээлтэй байдаг гэдгээ ч тэд хэлж байна.

Эдийн засгийн өсөлт нь иргэн бүрт хүрч амьдралд нь дэмжлэг үзүүлж чадахгүй, амьдралын наад захын хэрэгцээ болсон өргөн хэрэглээний хүнсний бараа бүтээгдэхүүн, хувцас, орон байр, үйлчилгээний үнэ тариф өдрөөс өдөрт нэмэгдсээр байхад 2014 оны төсвийн төсөлд цалин, тэтгэвэр тэтгэмжийг нэмэгдүүлэх арга хэмжээнд 200 тэрбум төгрөг тусгасан нь хэтэрхий бага байгааг эмч, багш нар илэрхийллээ.