Цагдаагийн байгууллагын шинэчлэлийн хүрээнд алба хаагчдаа хөгжүүлэх, гадаад, дотоодод сургаж бэлтгэхэд ихээхэн анхаарч олон талт арга хэмжээг зохион байгуулж байна. Эдгээр ажлуудын нэг болох мэргэжлийн боловсон хүчнийг бэлтгэх, давтан болон мэргэшүүлж сургах тал дээр анхаарч ЦЕГ, ХСИС-ын хооронд “Хамтын ажиллагааны санамж” бичгийг байгуулан ЦЕГ-ын дарга, бригадын генерал Б.Билэгт,  ХСИС-ын захирал, цагдаагийн хурандаа Р.Чингис нар үзэглэлээ.
    Санамж бичигт ЦЕГ нь Цагдаа, дотоодын цэргийн ажил мэргэжлээр суралцахаар хүсэлт гаргасан иргэдийг судлах, элсэлтийн шалгалтыг зохион байгуулах, мэргэжлийн стандарт, тодорхойлолт, сургалтын төлөвлөгөөг боловсронгуй болгох, бүх шатны мэргэжлийн дадлагын сургалтыг зохион байгуулах, мэргэшсэн албадын үйл ажиллагаатай холбосон сургалтын түшиц газар, клиник сургалтын төвүүдийг бий болгох, сургалтад мэргэшсэн албадыг оролцуулах, кабинет, лаборатори, сургалт-дадлагын цолцолбор байгуулах, сургалтад ашиглах ном, сурах бичиг, гарын авлага, сургалтын хэрэглэгдэхүүн бэлтгэх чиглэлээр туслалцаа үзүүлэх, цагдаагийн алба хаагчдад олгогдож буй зэвсэг, галт хэрэгсэл, тусгай техникийн хэрэгслүүдээс сургуульд өгч, сургалтад ашиглах нөхцөл бололцоог бүрдүүлэх, цагдаа судлал, гэмт явдал судлалыг хөгжүүлэх талаар ХСИС-тай хуулийн хүрээнд хамтран ажиллах болсон байна.  
    Мөн түүнчлэн он гараад хэрэгжиж эхлэх Цагдаагийн албаны тухай хуулийн дагуу цагдаагийн байгууллагын чиг үүрэг, бүтэц, зохион байгуулалтад зохих шинэчлэл, өөрчлөлт хйигдэнэ. Энэ нь алба хаагчдын ажлын байранд тавих боловсрол, мэдлэг, ур чадварын шаардлагыг шинэчилж, өөрчлөх шаардлагыг зүй ёсоор бий болгож үүнийг дагалдаад цагдаагийн мэргэжлийн боловсон хүчнийг бэлтгэх мэргэжлийн чиглэл, индексийг өөрчлөх, сургалтын төлөвлөгөө, хөтөлбөрийг шинэчлэн боловсруулах зэрэг шинэ хуулийг хэрэгжүүлэхтэй холбоотойгоор хоёр байгууллага хамтран зохион байгуулах шаардлагатай олон чухал ажлын өмнө хамтран ажиллах санамж бичгийг байгуулж байгаа нь цаг үеэ олсон арга хэмжээ юм.