УДЭТ-ын уран бүтээлчид өнөөдөр өвөл цагийн уран бүтээлийн нээлтээ  дэлхийн утга зохиолын ноён оргилуудын нэг, хоёр дахь мянганы манлай романаар тодорсон Испанийн утга зохиолын мастер Мигель Сервантсийн “Дон Кихот” жүжгээр нээх гэж байна. Уг жүжиг нь Монголын тайзнаа анх удаа амилах гэж буйгаараа онцлог бөгөөд Урлагийн гавьяат зүтгэлтэн, найруулагч Б.Баатарын олон жилийн өмнөх эмзэглэлээс мэндэлж байгаа “Монгол Кихот ноён” ийнхүү үзэгчидтэй уулзахад бэлэн болжээ.

 Зохиолч Мигель Де Сервантасын 1605 онд анх хэвлүүлж байсан “Кихот ноён” зохиол он цаг улирах тусам хэзээ ч үнэ цэнээ алдаагүй юм. Түүнээс хойш 1740 онд балет, 1743 онд Францад дуурь, 1903 онд кино, 1939 онд Орост драмын жүжгийн төрлөөр дэлхий дахины урлагийн олон тайзнаа тавигдаж байсан юм. Дуурь Бүжгийн Эрдмийн театр 1971 онд Хөдөлмөрийн баатар, Ардын жүжигчин Б.Жамяъндагвын дэглэлтээр балет болон тавигдаж байсан түүхтэй.

Харин энэ удаад УДЭТ-ын найруулагч Урлагийн гавьяат зүтгэлтэн Б.Баатарын найруулгаар үе, үеийн уран бүтээлчидээр дамжуулан Монгол Кихот ноёнтой уулзуулах нь ээ. Энэхүү тайзны томоохон бүтээлийн ерөнхий зураачаар С.Ариунболд, хөгжмийн зохиолч Т.Мөнх-Оргил, хувцасны зураачаар Э.Ариунгуа зэрэг уран бүтээлчид ажиллажээ.
Харин жүжгийн гол дүр Кихот ноёнд Гавьяат жүжигчин Б.Жаргалсайхан, Санчо Пансад  Соёлын тэргүүний ажилтан Г.Амгаланбаатар нар тоглож байгаа бол Перо Перест Соёлын тэргүүний ажилтан Л.Дэмидбаатар, Альдонса Лоренсод Б.Нармандах, Сансон Парраскод жүжигчин Г.Дөлгөөн-Аюуш, Антониод Д.Ганцэцэг нар тоглож байгаа аж.
"Кихот ноён" энэ сарын 8,9,10,16,17-нд 18.00 цагт драмын тайзнаа амилна.  Жүжгийн тасалбар суудлаасаа хамаарч 10-45 мянган төгрөг байгаа гэсэн шүү.