Олон жилийн дундажаас харахад “Тэмцэгчид” хавар цагийг сонгон жагсаал цуглаанаа хийж төв талбайг доргитол жагсдаг байж. Бүр болоогүй ээ үүнийг нь ард олон “Хаврын синдром” хэмээн нэрлэж бяцхан хошигноод авдагсан. Одоо харин энэ хошигнол “Намрын синдром” хэмээн улирлаа өөрчилжээ. Учир юу гэвэл энэ намар тохироо нь бүрдсэн хэд хэдэн эсэргүүцлийн жагсаал болж өнгөрсөн байх юм. Одоо ч жагсаал цуглааны буухиа тасраагүй бөгөөд удаах жагсаалууд эмч багш оюутнуудаар үргэлжлэх шинжтэй.

Намар цагаар болсон эхний дуулиант жагсаал бол төрийн ордондоо буун дуу хадаасан анхны тохиолдол болж түүхэнд тэмдэглэгдэн үлдэж буй "Гал үндэстэн"-ий жагсаал байлаа. Урт нэрт хуульд өөрчлөлт оруулахыг эсэргүүцсэн тэдний тэргүүн Ж.Мөнхбаярыг одоогоор шалгаж дуусаагүй л байна.

Удаах нь ГССҮТ-ын эмч ажилчдын хүний амиар дэнчин тавьсан тэмцэл юм. Тэд сонгон шалгаруулалтгүй томилогдсон хэрнээ баруун солгойгүй халаа сэлгээ хийх даргадаа хорсон сар гаруй хугацаанд тэмцлийн галаар бадарч байсан цаг саяхан. Үүнийг нь сайд нь тэвчиж сууж чадаагүй юу? аль эсвэл олны хэл амнаас айсан уу? бүү мэд ямартай ч будаг нь ханхалсан шинэхэн даргаа хусч орхисноор энэ хэрэг намжив.

Энд би даруухан хэрнээ төр засаг болон нийгэмд аятайхан мэссэж нисгэчихсэн нэгэн тайван жагсаалыг дурьдахгүй өнгөрч чадахгүй нь. Тэр бол "Номтой нөхөрлөе" клубээс зохион байгуулсан "Бид бааранд биш номын санд суумаар байна" уриатай жагсаал юм.  Жагсаалд 200 гаруй залуус оролцож 30 минутын турш төв талбайд ном уншин суусан бөгөөд тэд үүнийгээ дэлхийн жишигт нийцсэн номын сантай болох, дээр нь залууст ном уншихыг уриалах зорилготой хэмээн даруухнаар тайлбарлаж байсан билээ.

Дээрх гурван жагсаал цуглаан аль хэдийн болоод өнгөрсөн бол өнгөрөгч долоо хоногт МҮЭХ-ны эмч багш нарын ҮЭ-үүд цалин тэтгэвэр тэтгэмжийг 40 хувь нэмэхийг шаардан эсэргүүцлийн жагсаал хийхээ мэдэгдсэн юм. Ингээд ч зогсохгүй тэдний шаардлагийг хүлээн авахгүй бол ажил хаялт зарлана гэдгээ ч нийтэд мэдээлэв. Уг нь энэ оны төсөвт цалин, тэтгэвэр нэмэгдүүлэхэд 200 тэрбум төгрөг тусгасан тэр нь 8 орчим хувиар нэмэгдэх тооцоотой байгаа юм билээ. Чамлалтаас үүдэлтэй тэдний жагсаал өчигдөр болох байсан ч Монголын Үйлдвэрчний эвлэлийн холбоо, Ажил олгогч эздийн байгууллагын гурван талт хэлэлцээрийн үр дүнг мэдээлэхтэй холбогдуулан хойшилсон юм. Хэлэлцээр хийсэн нөхдүүд эдийн засагчидтай хамтран нөгөө 200 тэрбум дээрээ 35 тэрбумыг л нэмэх боломж байна гэсэн хариу өгөөд байна.  Нөгөө эмч багш нарт энэ нь таалагдах үгүйг мэдэхгүй юм. Ямартаа ч жагслаа шүү гэснийхээ хариуд 35 тэрбумийг нэмүүлчихнэ гэдэг бас ч хоосонгүй ээ.

Хамгийн сүүлд буюу өчигдөрхөн Монголын оюутны холбоо УИХ-ын гишүүдийг Монголд хийж байгаагүй жагсаал хийнэ шүү хэмээн "Сүрдүүлээд" авлаа.  Оюутны 70 мянгын асуудал гишүүдийн дунд нэлээдгүй маргаан дагуулж байгаа бөгөөд  үүнийг ялгавартай олгох уу, эсвэл нийтэд нь олгох уу гэдэг асуудлыг яг одоогоор Засгийн газар болоод УИХ-ын түвшинд хэлэлцэж байгаа юм. Зарим гишүүдээс 70 мянган төгрөгийг олгохдоо сурлагын чанар, их, дээд сургуулийн сургалтын орчинг харгалзах ёстой гэдэг санал ч гараад байгаа.

Гэтэл үүнийг сургаар л Монголын оюутны холбоо /МОХ/-ны нарийн бичгийн дарга Н.Бямбагэрэл “Дээд боловсролын санхүүжилт, суралцагчдын нийгмийн баталгааны тухай хууль”-д өөрчлөлт оруулахаар өргөн барьсан хуулийн төслийг буцаах. Хоёрдугаарт, үндэсний тэтгэлэг олгох хууль тогтоомжид өөрчлөлт оруулахдаа МОХ-ноос санал авч байх. Гуравдугаарт, үндэсний тэтгэлгийг хамрах хүрээ, хэмжээг бууруулахгүйгээр 2014 оны Улсын төсвийн төсөлд тусгах арга хэмжээ авах гэсэн шаардлага хүргүүлж байна. Хэрвээ бидний тавьсан шаардлагад 11 дүгээр сарын 15-ны дотор албан ёсоор хариу ирүүлэхгүй бол жагсаал хийнэ" гэж мэдэгдсэн нь шүүмжлэл дагуулаад байна.

Монголын оюутны холбоо /МОХ/ оюутны эрх ашгийг хамгаалдаг, тэдний дуу хоолой болсон байгууллагынхаа хувьд тэдний аливаа асуудалд дугарах нь зөв. Гэхдээ тэтгэмж өгсөнгүй, автобусанд үнэгүй явуулсангүй, сургалтын төлбөр хөнгөлсөнгүй гэж жагсаал, цуглаан хийж байхын оронд оюутнуудын сурлагын чанар, сурах нөхцөлд нь анхаарлаа хандуулбал дээргүй юу.