Улаанбаатар-Замын-Үүд чиглэлд тун удахгүй буухиа автобус аялахаар болжээ. Зам тээврийн яамнаас тус чиглэлд том оврын автобус явуулах аж ахуй нэгжүүдийг сонгон шалгаруулахаар бэлтгэж байна. Ойрын хугацаанд энэ чиглэлийн маршрутыг ЗТ-ын сайд баталснаар уг ажил эхлэх юм. 

   Албаны эх сурвалжийн мэдээлж буйгаар энэ ажилд орон нутгийн тээвэрчдийг түлхүү оролцуулахаар төлөвлөж байгаа бөгөөд 45-дээш хүний багтаамжтай люкс ангилалын автобусууд тус чиглэлд үйлчлэх гэнэ.

Үүнээс гадна үнэ тарифын хувьд өмнөх сайдын тушаалаар батлагдсан жишиг тариф буюу нэг хүн нэг километрт 50-55 төгрөгөөс хэтрэхгүй гэдгийг хэлж байлаа. Ийнхүү тус чиглэлд автобус явж эхэлснээр зорчигчдын цагийг хэмнэж 7-8 цагийн дараа Замын-үүд хүрэх боломжтой болно.

Түүнчлэн ирэх оноос олон улсын жишигт нийцсэн зам дагуух байгууламжуудыг барих төсөл хэрэгжиж эхэлнэ. Ингэхдээ 250 км тутамд зочид буудал, цайны газар,  дэлгүүр хоршоо, нийтийн бие засах газар, шатахуун түгээгүүр зэргийг нэгтгэсэн нэг байгууламж байх юм.  Гэхдээ тус байгууламжуудыг Зам тээврийн яам барихгүй бөгөөд  хувийн хэвшлүүдэд зураг төслийг  нь өгч санал тавих аж. Одоогоор энэ ажлын зураг төсөл хийгдээд явж байгаа гэнэ.