Баянгол дүүргийн 38 дугаар сургуулийн багш ажилчид 960 хүүхдийн шинэ сургууль барих газраа дүүргийн Засаг даргадаа алдчихлаа хэмээн хэвлэлийнхэнд хандлаа.

Тус сургууль нь 1200 хүүхэдтэй бөгөөд хоёр ээлжээр хичээллэдэг байна. Сургуулийг акталж, нураах шийдвэрийг гаргасан учраас одоо сургуулийн хүүхдүүд хоёр хуваагдан Баянгол дүүргийн 78, 47 дугаар сургуульд хичээллэж байгаа аж. Гэтэл шинээр сургууль барих гэж байсан талбайгаа Баянгол дүүргийн Засаг дарга Оросоод алдчихлаа гэж хэмээн сургуулийн багш, ажилчид хэлж байна.

 Тус сургууль нь нийтдээ 8000 метр квадрат талбайтай. 2006 онд газраа баталгаажуулж 2015 хүртэл эзэмших гэрчилгээгээ авсан аж. Гэтэл 960 хүүхдийн сургууль барих 1700 метр квадрат талбайг дүүргийн Засаг дарга авна гэж зүтгэжээ.

Дүүргийн Засаг дарга эл газарт нутгийн захиргааны ордон, авто машины зогсоол барина гэсэн байна. Энэ тухайгаа ч албан ёсоор багш, ажилчдад мэдэгдээгүй аж.

Газрын хөрсний дээж авна гээд өрөмдлөгийн машин ирэхэд нь багш нар мэдсэн гэнэ. Сургуулийн ажилчид Оросоо даргатай хоёр удаа уулзах гээд чадаагүй байна. Тиймээс уг асуудлаар маргааш хэвлэлийнхэнд албан ёсоор хандахаар болжээ.

Энэ талаар Э.Бат-Үүл даргад хэлэхэд зохих газарт нь хандаж асуудлыг шийдвэрлэх болно гэжээ.