Гаалийн байгууллага эрсдлийн судалгаанд үндэслэсэн хяналт шалгалтыг оновчтой тогтмол зохион байгуулснаар Гаалийн ерөнхий газрын харьяа 18 газар, хороод 2013 оны эхний 10 дугаар сарын байдлаар нийт захиргааны 2371 зөрчил, эрүүгийн гэмт хэргийн шинжтэй 100 зөрчил илрүүлэн хянан шийдвэрлэсэн байна.

 Үүнд Улаанбаатар хот дахь Гаалийн газар захиргааны 836, эрүүгийн шинжтэй зөрчил 26, Замын-Үүд дэх Гаалийн газар захиргааны 634, эрүүгийн шинжтэй 40 зөрчил илрүүлэн таслан зогсоосон байна. Гаалийн байгууллага зөрчилд холбогдсон нийт  41,6 сая төгрөгний бараа хураан авч улсын орлого болгосон байна. Гаалийн тухай хууль тогтоомж зөрчсөн үйлдэлд нийт 368,2 сая  төгрөгний торгууль ногдуулснаас  Улаанбаатар хот дахь Гаалийн газар 173,0 сая төгрөгийн торгууль, Замын-Үүд дэх Гаалийн газар 141,9 сая төгрөгний торгууль ногдуулсан байна. Нийт 251,5 сая төгрөгний зайлсхийсэн татвар нөхөн төлүүлснээс Улаанбаатар хот дахь Гаалийн газар 98,6 сая төгрөг, Замын-Үүд дэх Гаалийн газар 134,2 сая төгрөгний зайлсхийсэн татвар нөхөн төлүүлж  улсын төсөвт төвлөрүүлжээ. Гаалийн байгууллагын илрүүлэн таслан зогсоосон нийт зөрчлийн  дийлэнх нь хориглосон хязгаарласан барааг улсын хилээр хууль бусаар нэвтрүүлэхийг завдах, гаалийн болон бусад татвар төлөхөөс зайлсхийх, гаалийн улсын байцаагчийн хууль ёсны шаардлагыг биелүүлэхгүй байх, мэдүүлэх журам зөрчих зөрчлүүд эзэлж байна.

 Гаалийн байгууллагын илрүүлсэн гэмт хэргийн шинжтэй үйлдлийн олонх нь их хэмжээний татвар төлөхөөс санаатайгаар зайлсхийх, түүх соёлын дурсгалт зүйлсийг улсын хилээр хууль бусаар нэвтрүүлэхийг завдах, хар тамхи мансууруулах бодис, эм эмийн зүйлс, химийн бодис, эд зүйлийг улсийн хилээр хууль бусаар нэвтрүүлэх үйлдэл байна.

  Гаалийн харилцаанд оролцогчид сайн дураараа хууль тогтоомжийг мөрдөн, хууль сахилтаа дээшлүүлэхийг Гаалийн байгууллагаас анхааруулж байна.