МУИС-ийн Удирдах зөвлөл өнгөрсөн баасан гаригийн орой хуралдаж томоохон бүтцийн өөрчлөлтийг хийсэн. Тодруулбал, салбар сургуулиудаа татан буулгаж, оронд нь дөрвөн том сургууль байгуулах талаар хэлэлцсэн юм. Хамгийн гол нь МУИС-ийн багш, ажилчид, оюутнуудаас ямар нэгэн санал авалгүйгээр ийм шийдвэр гаргаж байгаад багш ажиллагсад нь ихээхэн дургүйцэж байгаа аж. Тиймээс тус сургуулийн багш ажилчид яг одоо сургуулийнхаа нэгдүгээр байрны дугуй танхимд уулзаж, уг асуудлын талаар ярилцаж байна. Тус өөрчлөлтийг тус сургуулийн багш, оюутнууд эсэргүүцэж байгаа бөгөөд жагсах дээрээ хүртэл тулаад байгаа юм. Мөн МУИС-ийн захирал А.Галтбаярыг огцруулахаар оюутнуудын гарын үсгийг цуглуулж эхэлсэн гэв. Үүнд МУИС-ийн Үйлдвэрчний эвлэл, Оюутны холбоо, багш нарын холбоо нэгдэж байгаа юм байна.

МУИС-ийн багш нарын зүгээс “Математикийг хэлний хичээлтэй хольж болохгүй. Хэрвээ уг шинэчлэл хийгдвэл хамт олны зөвлөл татан буугдана. Мөн сургуулийн гол байгууллага болох эрдмийн зөвлөл бэлэг дэмбэрэлийн шинжтэй болно. Бүрэлдэхүүн сургуулиуд захирлаа сонгодог байсан бол тэр зарчим халагдаад МУИС-ийн захирал өөрөө шууд томилдог болох гээд байна. Манай сургуульд олон дарга нар хийх ажилгүй суудаг гэж ярьж байна лээ. Тийм зүйл байхгүй. Бид эрдмийн ажлаа хийгээд хичээлээ заагаад явж байгаа. Хүүхдүүд хичээлээ сонгож хичээллэх нь зөв. Гэхдээ захиргаа нь нэг болж болохгүй" гэсэн юм.

Харин холбогдох албаныхан тус сургуулийг цэгцэлж, шинэчлэх шаардлагатай. Энэ бол судалгаа шинжилгээтэй ажил хэмээн тайлбарлаж байгаа юм.

Хэрэв бүтцийн өөрчлөлт хийгдвэл Хуулийн сургууль, Байгаль, нийгэм хүмүүнлэгийн ухааны сургууль, Хэрэглээний шинжлэх ухааны сургууль, Бизнесийн сургууль гэсэн үндсэн дөрвөн сургуультай болох юм.