Инженерийн шугам сүлжээ, камерын ашиглалтын байдалд Захирагчийн ажлын албанаас мэргэжлийн байгууллагуудтай хамтарч хяналт, шалгалт хийжээ.

Өнгөрсөн аравдугаар сард авсан судалгаагаар нийслэлд нийт 151 ширхэг таггүй инженерийн шугам сүлжээний худаг байсан байна. Тиймээс харъяа орон нутгийн өмчит аж ахуйн тооцоот үйлдвэрийн газруудад Улаанбаатар хотын Захирагчийн ажлын албанаас таггүй инженерийн шугам сүлжээний худгуудыг тагтай болгох шаардлага хүргүүлээд байгаа аж. Өнөөдрийн байдлаар холбогдох газрууд өөрсдийн нөөц бололцоог ашиглан 134 ширхэг инженерийн шугам сүлжээний худгийг  засаж, шинэчлэн тагтай болгосон бол 388 ширхэг худгийг сэргээн засварлах ажил хийгджээ. Энэ ажилд нийт 43.9 сая төгрөг зарцуулсан байна. Инженерийн шугам сүлжээний худгуудыг тухайн нутаг дэвсгэрт байрлах аж ахуйн нэгжээс гадна Ус сувгийн удирдах газар, Улаанбаатар дулааны шугам сүлжээ зэрэг уг худгийг ашиглаж буй байгууллагууд хариуцдаг. Тиймээс нийслэлийн Засаг даргын захирамж, холбогдох албаны үүргийг биелүүлээгүйн улмаас таггүй инженерийн шугам сүлжээний худагт иргэд унаж бэртэх эрсдэл гарсан тохиолдолд тухайн байгууллага хариуцах ёстой гэсэн байна.