Нийслэлийн цагдаагийн газраас тэнэмэл, траншейний гэх иргэдийг гэмт хэргээс урьдчилан сэргийлэх төсөл хөтөлбрүүдийг өнгөрсөн жилийн хоёрдугаар сараас зохион  байгуулсан байдаг. Үүний хүрээнд  “Эрчүүд, эрүүл гэр бүл”, “Эгэл амьдралын мөр” төрийн бус байгууллагуудтай хамтраад 100 гаруй хүнийг нийгэмшүүлэх ажил амжилттай хийгдсэн талаар бид цуврал мэдээ мэдээллийг хүргэж байсан.

Тэгвэл энэхүү төслийн үргэлжлэлийг хийж байгаа гэх таатай мэдээллийг дахин хүргэж байна. Өөрөөр хэлбэл, Нийслэлийн цагдаагийн газар, Нийслэлийн Засаг даргын тамга газар энэхүү төслөө дахин үргэлжлүүлж “хүн бусаар амьдарч байгаа” гэх тэдгээр иргэдийг зөв амьдралруу нь оруулах ажлаа эхэлжээ.

Төсөл хэрэгжиснээс хойш 16 гаруй хүн ажлын байраар хангагдсан байдаг. Одоогоор эдгээр хүмүүсээс харуул хамгаалалтын байгууллага болох “OCD”, “Суман гүн” нарийн боовны цех зэрэгт ажиллаж байгаа аж.

Нийслэлийн цагдаагийн газрын Согтуурал, мансуурлаас урьдчилан сэргийлэх, хянах ажил хариуцсан ахлах байцаагч Б.Мэндбаяр хэлэхдээ “Өмнө нь “Тэнэмэл” гэх арга хэмжээг зохиож 100 гаруй хүмүүсийг гудамжны амьдралаас татаж гаргасан бол энэ удаад “Зөв алхам” нэртэйгээ төслөө үргэлжлүүлж байна. Нийслэлийн засаг даргын тамгын газраас 10 сая төгрөгний санхүүжилттэй төсөл юм. Гурван сарын хугацаатай тэнэмэл гэх тодотголтой 10 хүнийг сонгож ажиллаж байна. Хэрэв эдгээр 10 хүн өөрчлөгдөж чадвал бид ажилд зуучилж, нийгэмшүүлэх юм. Ямартаа ч бид энэхүү төслүүдийг хийж байгаа нь эдгээр хүмүүсийг гэмт хэрэг зөрчлөөс урьдчилан сэргийлэх, улмаар нийгэмшүүлж зөв амьдралын хэвшилд оруулах зорилготой. Одоогоор бүх хүмүүсийг нийгэмшүүлэх төсөв мөнгөний бололцоогүй ч  эхний ээлжийн хүмүүсээ нийгэмшүүлэх төслөө хэрэгжүүлсээр байна” гэв.