Хүн амын хөгжил, нийгмийн хамгааллын яам энэ сарын 25-наас ирэх арванхоёрдугаар сарын 9-нийг хүртэл  өрхийн амьжиргааны түвшин тодорхойлох судалгааг орон даяар явуулах гэж байна. 

Уг судалгаа нь Монгол Улсын нийт 2,9 сая иргэний амьжиргааны түвшний үзүүлэлтүүдийг багтаасан салбар дундын цахим мэдээллийн сан бүрдүүлэх зорилготой юм. Улмаар судалгааны дүнг үндэслэн төрөөс үзүүлэх аливаа төрлийн нийгмийн тусламж, үйлчилгээнд хамруулах өрх, иргэнийг оновчтой тодорхойлох, ядуурлыг бууруулах болон өрхийн амьжиргааг дээшлүүлэх хөтөлбөрүүдийн уялдаа зохицуулалтыг хангах, нийт өрх иргэнд үзүүлэх төрийн бусад үйлчилгээг төлөвлөх, хэрэгжүүлэхэд салбар дундын мэдээллийн цахим санг ашиглах бүрэн боломжтой болно.

Одоогоор нийт өрхийн жагсаалтыг бэлтгэж, аймаг, сум, дүүрэг, баг, хорооны өрхүүдийн газрын зургийг бэлэн болгосон бөгөөд судалгаанд ажиллах судлаач буюу тоологч, мэдээлэл шивэгч, хөтөч, жолооч нарыг боловсрол, бичиг үсгийн чадамж, харилцааны соёл, ажлын туршлага зэргийг харгалзан сонгон шалгаруулж, хүн тус бүртэй гэрээ байгуулан ажиллах аж.

Судалгааг авахдаа өрхийн насанд хүрсэн аль нэг гишүүнээс авах ба иргэд иргэний цахим үнэмлэхээ, эсхүл төрсний гэрчилгээ, эрүүл мэндийн даатгалын дэвтэр, цэргийн үүрэгтний үнэмлэх зэрэг бичиг баримтаа судалгааны үеэр гэртээ байлгах хэрэгтэй гэнэ.

Түүнчлэн ХАХНХЯ-аас иргэдэд судалгаа авах тоологч нарт орон нутгийн ажлын хэсгийн даргын гарын үсэг, тамга тэмдэг бүхий үнэмлэх олгосон учраас судлаачийн бичиг баримтыг шалган гэр орондоо оруулахыг иргэдэд анхааруулсан байна.