МҮОХ, Монголын спортын сэтгүүлчдийн холбоо /МССХ/ хамтран зохион байгуулдаг Монгол Улсын оны шилдэг тамирчин тодруулах “Бөртэ чоно” ёслолыг ирэх сарын 23-нд зохион байгуулахаар товложээ.

“Бөртэ чоно” наадмын шилдгүүдийг буюу оны шилдэг тамирчин, дасгалжуулагчийг олон улсын жишгээр спортын сэтгүүлчдийн саналаар тодруулдаг. Тиймээс спорт холбоод 2013 оны шилдэгт нэр дэвшигчдийн саналаа албан ёсоор МССХ-нд ирүүлдэг. Оны шилдэгт нэр дэвшүүлэх албан хүсэлтээ, нэр дэвшигчийн 2013 оны амжилтын мэдээлэлтэй хамт энэ сарын 15-24-нд МҮОХ-ны “Олимпийн ордон” дахь МССХ-ны шуудангийн хайрцагт, “Ажлын хэсэгт” хэмээн хаяглан ирүүлэх эсвэл mongolia_sportspress@yahoo.com мэйл хаягаар илгээх юм.

МССХ-ны гишүүн сэтгүүлчид санал өгч, спорт холбоодын нэр дэвшүүлсэн тамирчин, дасгалжуулагчдаас шилдгийн шилдгийг тодруулж, спортын тавцанд тив, дэлхийд нэрээ дуурсгасан сор тамирчдыг тодруулдаг.