НИТХ-ын Тэргүүлэгчдийн энэ сарын 21-ны өдрийн ээлжит хуралдаанаар “Улаанбаатар хотын Нийтийн үйлчилгээний шуурхай удирдлага зохицуулалтын төв”-ийг байгуулахаар болсон. Үүнтэй холбоотойгоор Улаанбаатар хотын Нийтийн үйлчилгээний шуурхай удирдлага зохицуулалтын төв хэрхэн ажиллах талаар Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадралаас тодрууллаа.

- Улаанбаатар хотын Нийтийн үйлчилгээний шуурхай удирдлага зохицуулалтын төв нь ямар зорилго, чиглэлтэйгээр үйл ажиллагаагаа явуулах вэ?

- Энэ төв нь эрүүл, аюулгүй, тухтай орчинд иргэдийн ажиллаж, амьдрах нөхцөлийг бүрдүүлэх зорилгоор инженерийн хангамж, хот тохижилт, орон сууц, нийтийн аж ахуйн бүх байгууллагын үйлчилгээ, үйл ажиллагааг нэгтгэн нэгдсэн удирдлагаар хангаж, байгууллагуудтай холбоотой бүхий л мэдээллийг нэг утсаар хүлээн авч, зохицуулж ажиллана. Одоогоор эдгээр байгууллагууд хэрэглэгчдийн гомдол, хүсэлтийг тус тусдаа диспетчерээр хүлээн авч байгаа. Нэгдсэн диспетчертэй болсноор иргэдээс ирүүлсэн нийслэлийн аж ахуйн асуудлыг богино хугацаанд шийдвэрлэх боломж бүрдэнэ гэж үзэж байгаа юм. Өөрөөр хэлбэл, иргэд цахилгаан, дулаан, ус, замын хөдөлгөөний ачаалал, халтиргаа, зам цэвэрлэгээ, арчилгаатай холбоотой санал хүсэлт, гомдлоо нэг л газар хандаж шийдвэрлүүлнэ гэсэн үг.

-Энэ төв нь зөвхөн хот тохижилт, инженерийн хангамж , орон сууц, нийтийн аж ахуйн байгууллагын дуудлагыг хүлээж авах  юм уу?

-Бид мэдээллийн технологийн орчин үеийн шийдэлд тулгуурласан Диспетчерийн төв байгуулахаар төлөвлөсөн бөгөөд эхний ээлжинд мэдээлэл хүлээн авах замаар буюу хяналт, мониторингийн дэд бүтцийн үндсэн бааз суурийг бий болгох юм. Мөн камергүй гудамж, талбайг камержуулж хяналт тавина. Цаашид төвийн үйл ажиллагааг өргөжүүлэн дээрх байгууллагуудаас гадна дэд бүтцийг нэмэгдүүлэх замаар Улаанбаатар хотын нийтийн үйлчилгээг бүхэлд нь хянах, удирдах, хот орчмын байгаль орчны хяналтыг ч гүйцэтгэх боломжтой болно гэж тооцоолж байгаа. Одоогоор бэлтгэл ажил хийгдэж байна. Шинэ он гараад  Улаанбаатар хотын Нийтийн үйлчилгээний шуурхай удирдлага зохицуулалтын төв албан ёсоор үйл ажиллагаагаа эхэлж, ямар дугаарын утсаар иргэдийн хүсэлтийг хүлээж авах нь тодорхой болно гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.