Уул уурхайн яамнаас зохион байгуулдаг “Ил тод уул уурхай” хэвлэлийн хурал өнөөдөр боллоо. Хурлын эхэнд УИХ-ын чуулганаар хэлэлцэж байгаа эрх зүйн баримт бичгүүдийг танилцуулсан юм. Тодруулбал УИХ-ын намрын чуулган, Байнгын хороодын хуралдаанаар “Төрөөс эрдэс баялгийн салбарт баримтлах бодлогын баримт бичиг”, “Алтны худалдаанд ил тод байдлыг бүрдүүлэх тухай” хуулийн төсөл “Түгээмэл тархацтай ашигт малтмалын тухай” хуулийн төсөл, “Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хууль”-ийн төсөл, “Газрын тосны тухай хууль”-ийн шинэчилсэн найруулгын төсөл зэргийг хэлэлцүүлж байна.
Үүнээс “Төрөөс эрдэс баялгийн салбарт баримтлах бодлогын баримт бичиг”-ийн төслийг өнгөрсөн долоо хоногийн УИХ-ын чуулганы нэгдсэн хуралдаанаар хэлэлцэж дэмжээд эцсийн хэлэлцүүлэгт бэлтгэхээр Эдийн засгийн байнгын хороонд шилжүүлжээ.
Түүнчлэн дээрхи эрх зүйн баримт бичгүүдийг УИХ-аар батлуулсны дараа тэдгээрийг сурталчлах, эрдэс баялгийн салбарт тулгамдаж буй асуудлууд, шийдвэрлэх арга зам болон салбарын хөгжлийн хэтийн төлөв, бүтээмж ба өрсөлдөх чадварыг хэрхэн дээшлүүлэх талаар олон нийтийн дунд нээлттэй хэлэлцүүлэгийг УУЯ зохион байгуулахаар болжээ. Нээлттэй хэлэлцүүлэг ирэх оны нэгдүгээр сарын 15-ны өдөр болно. Мөн энэхүү хэлэлцүүлгийг угтаж дэд хэлэлцүүлэг буюу сэдэвчилсэн хэлэлцүүлгүүдийг ч зохион байгуулна гэлээ.
