“Гал үндэстэн” холбооны   жигүүр “Тусгаар Монголынхоо төлөө нэгдэгсэд” хөдөлгөөний удирдах зөвлөлийн гишүүн  О.Лхагвадоржтой “Гал үндэстэн” холбооныхонтой холбоотой асуудлаар ярилцлаа.

-Ц.Мөнхбаярын хувьд Прокурорын байгууллагад зүйл ангиа өөрчлөхийг хүсч хүсэлт гаргасан гэх мэдээлэл гараад байгаа. Яг ямар зүйл ангиар хэрэг үүсэх ёстой гэж үзээд байгаа вэ?
-Үүнийг сайн мэдэхгүй. Учир нь гэр бүлийнхэн нь ч уулзахад хэцүү байдалтай байна. “Зүүн хараа” руу аваад явчихсан гэж яригдаж байсан ч 406 хохир ангидаа байгаа л юм шиг байна лээ. Эх оронч, зөв сэтгэлтэй хүмүүсийг  ямар нэг байдлаар дарах, энэ зүйлээр шалтаглаж эх орноо гэсэн иргэний байгууллагуудын нэр сүрийг гутаах үйл ажиллагааг төр засаг, эрх баригчид, тэдний гар хөл болсон хуулийнхан явуулж байна гэж бидний хувьд үзэж байгаа.  Ц.Мөнхбаярыг олон нийтийг хамруулсан аюултай үйл ажиллагаа явуулах хүн мөн үү, биш үү гэдгийг мэдэх хүмүүс нь  мэднэ.  Тухайн үед цагдаа, хамгаалалтынхан бариад авахад ямар ч эсэргүүцэл үзүүлэлгүй баригдаад явсан шүү дээ.

-“Гал үндэстэн” холбооныхны хорих хугацааг хэд хэдэн удаа сунгалаа. Үнэхээр гадуур байцаах боломж байхгүй байгаа юм болов уу?
-Гадуур байцаах бүрэн боломжтой. Тэр хүн ямар зугтаад алга болчих биш. Мөн ямар нэгэн зүйл луйвардсан, гэмт хэрэг үйлдсэн зүйл байхгүй шүү дээ. Тэр мөнгө төгрөгний асуудал ч бас үнэнд нийцэхгүй. Тухайн компаниудын эзэд өөрсдөө өгчихөөд дараа нь сүрдүүлсэн гэж ярьж байна. Өөрөөр хэлбэл,  үйл ажиллагаагаа явуулахад туслаач гэж мөнгө төгрөг өгчихөөд сүүлд нь түүний эсрэг болгож байгаа.
Шударга олон нийт бол үүнийг ойлгоод, эх орныхоо төлөө тууштай тэмцэж байгааг нь мэдэж байгаа байх.

-Та бүхэн хоригдож байгаа хүмүүстээ холбоотой байгаа юу. Биеийн байдал нь ямар байна?
-Г.Болдбаатар, н.Төмөрбаатар нарын бие  нэлээн муудсан гэж сонсогдсон. Бид өөрсдөө уулзах боломжгүй байгаа учраас хүмүүсээс л сонсох юм.

-Цаашид хуулийн хүрээнд болох бүхий л арга хэмжээг аваад суллах талаар хөөцөлдөж үзнэ гэсэн. Хэрэв үр дүнд хүрэхгүй бол өөр ямар арга хэмжээ авах вэ?
-“Гал үндэстэн” холбоог дэмждэг, хийж буй ажлыг нь зөв зүйтэй гэж үзэж байгаа ард иргэд, хөдөлгөөнүүд нийлж шударга бус зүйл гэдгийг нь хэлж ярьж, хандаж байгаа. Цаашдаа хүчээр ямар нэг зүйлийг хийх боломж бололцоо байхгүй. Хуулийн дагуу л бүгдийг хийнэ.

-Нийт хэчнээн хүн хоригдож байгаа вэ. Мөн хэд нь батлан даалтад гарсан бэ?
-Одоогоор зургаан хүн хоригдож байгаа. Хоёр хүн батлан даалтад гарсан. Сүүлд нь бас цэргийн ангийнханы талаар яригдсан. Тэр чухам ямар хүмүүс байгааг бид мэдэхгүй байна.