МУГЖ С.Жавхлан 2013 онд “Хамаг Монгол” төслийг санаачлан амжилттай хэрэгжүүлсэн билээ. Тэгвэл ирэх 2014 онд “Дэлхийн Монгол” төслийг хэрэгжүүлэхээр болсон талаараа өнөөдөр дуулгалаа. Тэрбээр өмнө нь хэрэгжүүлсэн “Хамаг Монгол” төслөөрөө Буриад, Халимаг, Өвөрмонгол, Тувагийн дуучидтай хамтран Монгол туургатан улсуудаар явж ая дуугаа өргөсөн.
Тэгвэл С.Жавхлан ирэх онд хэрэгжүүлэх “Дэлхийн Монгол” төслийнхөө хүрээнд дэлхийн өнцөг булан бүрт байгаа Монголын соёлын биет өвийг цуглуулахаар болсон байна. Монголын хаад, ноёд, язгууртан болон жирийн ард түмний эдэлж хэрэглэж байсан соёлын эд өлгийн үнэт өвүүдийг  “Дэлхийн Монгол” төслийнхөн цуглуулан Монголд авчран нэгтгэж үзмэр болгох аж. АНУ-д гэхэд дөрвөн иргэнд Монголын 200 гаруй эд өлгийн зүйл хадгалагдаж байдаг байна. Энэ мэт Орос, Өвөрмонгол гээд олон оронд манай соёлын үнэт биет өв байдаг гэдгийг төслийн багийнхан хэллээ. Тиймээс эдгээр өвүүдийг эргүүлэн эх оронд нь авчирж музей байгуулах хүсэлтэй байгаа гэдгээ төслийг санаачлагч С.Жавхлан хэлж байна. Эхний ээлжинд Монголд байдаг бүх музейгээр явж, судалгаа хийх юм байна. Үүний дараа хувь хүний гар дээр байгаа соёлын биет өвүүдийг цуглуулах аж.

Ингэхийн тулд ССАЖ, ГХЯ гэх мэтчилэн холбогдох яамдуутай хамтран ажиллах хэрэгтэй байгаа гэв. Судалгааны ажлын үеэр “Go” продакшныхан баримтат кино хийх юм байна. Соёлын өвийг хадгалж байгаа бүх хүмүүстэй уулзсан, эд хэрэглэлийг нь сонирхсон, музейд тавих асуудлаар ярилцсан гэх мэт судалгааны явцын талаарх бүх мэдээллийг уг баримтат кинонд харуулах юм байна.