Монголын бичил уурхайн “Нэгдсэн дээвэр” холбооны гүйцэтгэх захирал, “Буянтын хөндий” ТББ-ын  тэргүүн О.Цэцэгмаа өнөөдөр бичил уурхайчдад тулгамдаад байгаа асуудлын талаар мэдээлэл хийлээ. Энэ үеэр түүнээс  алтны тухай шинэ хуулийн төслийн талаар тодруулахад, “Өнөөдөр бичил уурхайчин гэх салбарын дор хүмүүс өнөөх алтаа гадагш гаргадаг ийм асуудал гаргавал яах вэ гэдгийг бодолцох хэрэгтэй. Бид хийгээгүй хэргээ хүлээмээргүй байна. Тэгэхээр алтны ил тод хууль энэ мэт зөв зүйтэй зүйлийг тусгаж үнэхээр батлагдвал Монголын бүх баялаг Монголдоо л  төвлөрөх нь гэж бид харж байгаа. Энэ хууль  сайшаалтай, сайн байх ёстой” гэв. Мөн түүнээс  бичил уурхайчид яг хэр хэмжээний алт олдог байсан талаар тодруулахад, “Портер шорооноос л гэхэд 3 грамм алт олж байгаа. Олсон гурван грамм алтыг  тэр өдрийн зарлагаа хасаад 6-7 хүн хувааж авна.  Тэнд байгаа ченж нарт л бичил уурхайчдын алт төвлөрдөг. Ченж нар алтыг хааш нь аваачдагийг бид мэдэхгүй” гэв.

Дашрамд хэлэхэд, Шинэчлэлийн Засгийн газар Монгол орны нутаг дэвсгэрт олборлосон алтны худалдааг зохицуулах эрх зүйн орчинг сайжруулах нэрийдлээр  “Алтны худалдаанд ил тод байдлыг бүрдүүлэх тухай” хуулийн төслийг Монголбанк, Эдийн засгийн хөгжлийн яам болон мэргэжлийн холбоод, салбарын эрдэмтдийн төлөөллийг оролцуулан боловсруулж Засгийн газраас УИХ-д өргөн бариад хэлэлцүүлгийн шатандаа явж байгаа.