Гаалийн ерөнхий газрын харьяа Замын-Үүд дэх гаалийн газар нь шинэ “Авто замын шалган нэвтрүүлэх цогцолбор-2” гаалийн хяналтын бүсийн үйл ажиллагааг өчигдрөөс эхлэн байнгын ажиллагаанд шилжүүлж, тухайн терминал бүрэн хүчин чадлаараа ажиллаж эхэллээ.

Өнөөдөр үйл ажиллагаа нь бүрэн хүчин чадлаараа ажиллаж эхэлсэн Гаалийн байгууллагын тухайн терминалд Хилийн цэрэг, Хилийн мэргэжлийн хяналтын алба, Гадаадын иргэн харъяатын алба ажиллаж, хүнд даацад зориулсан хатуу хучилттай шинэ авто замаар БНХАУ-ын Эрээн боомтоос ачаатай автомашинуудыг хүлээн авч байна.

        Ачааны шинэ терминалд явагдах хяналтын үйл ажиллагааг ЗГ-ын 20-р тогтоолоор батлагдсан “Хилийн хяналтын байгууллагуудын үйл ажиллагааг зохицуулах журам”, гаалийн хяналтын технологи дэс дараалалд нийцүүлэн зохион байгуулж, үйл ажиллагаа явагдах нөхцлийг бүрдүүлснээр гаалийн хяналт, бүрдүүлэлт зохих горимын дагуу хэвийн явагдаж байна.

Энэхүү цогцолборын зорилго нь шинэчлэлийн ЗГ-аас гадаад худалдааг дэмжиж хөнгөвчлөх, гадаад худалдааны саад тотгорыг арилгах, хилийн боомтод үүсдэг бөөгнөрөл болон ачааллыг зохицуулах, ингэснээрээ өргөн хэрэглээний бараа бүтээгдэхүүн ялангуяа барилгын материалын импортын үйл ажиллагааг дэмжсэнээр үнэ бууруулах, иргэдэд ирэх үнийг дарамтыг багасгах зорилго агуулж байна.