Хот, суурин газрын цэвэрлэх байгууламжуудын үйл ажиллагаанд МХЕГ-аас шалгалт хийжээ.

 Хяналт шалгалтад аймаг, нийслэлийн ахуйн бохир ус цэвэрлэх 46 байгууламж хамрагдсан байна. Хяналт шалгалтаар бохир ус цэвэрлэх байгууламж нь эрүүл ахуйн болон хамгаалалтын бүс тогтоогоогүй, дотоодын хяналтын лабораторигүй, цэвэрлэгээнээс гарсан лаг, хог хаягдлыг төрөлжүүлж, хог хадгалах түр цэгт ангилан хаядаггүй зэрэг олон дутагдал илэрчээ. 

Улаанбаатар хотод үйл ажиллагаа явуулж байгаа ахуйн бохир ус цэвэрлэх байгууламжууд нь цэвэршүүлсэн бохир усаа Туул голд нийлүүлдэг нь мөн илэрчээ. Туул голоос Төв аймгийн Алтанбулаг сум хүртэл нийт 8 цэгээс авсан шинжилгээгээр цэвэршүүлсэн бохир ус нийлж буй "Сонгино"-ын гүүрийн ойролцоо исэлдэх чанар, биохимийн хэрэгцээт хүчилтөрөгч, химийн хэрэгцээт хүчилтөрөгч, шим бохирдлын үзүүлэлтүүд, гэдэсний савханцрын тоо хамгийн ихээр гарсан байна.  

Харин аймгуудын ахуйн бохир ус цэвэрлэх байгууламжид эмнэлэгийн /халдвартын/ бохир усыг урьдчилан цэвэрлэхгүйгээр шууд нийлүүлж байсан байна. Цэвэрлэх байгууламжуудын үндсэн болон туслах тоног төхөөрөмж, шугам хоолой хаалт арматурууд хуучирч зэвэрч муудсан, тэдгээрийн барилга байгууламжуудын дотор засал, хаалга, цонх, шал  элэгдэж муудсан, зарим худаг таггүй байгаагаас хог шороо орох, хүн мал унаж гэмтэх нөхцөл бүрдсэн, шугам сүлжээнд байнга үзлэг шалгалт явуулж гурван жил тутам засвар үйлчилгээ хийж, илэрсэн зөрчлийг арилгаж ажиллаагүй зэрэг зөрчил мөн илэрчээ.

Шинжилгээний дүнд үндэслэн улсын байцаагчийн 12 дүгнэлт гаргаж, улсын байцаагчийн 27 албан шаардлагаар хугацаатай үүрэг даалгавар өгч, холбогдох хууль тогтоомжийн заалтыг үндэслэн 9.600.000 төгрөгний торгуулийн арга хэмжээ авсан байна.